Teymur Rəcəbov geriləyib, Rauf Məmmədov isə... - Reytinq açıqlandı
30-11-2019, 23:57
FİDE yeni reytinq cədvəlini açıqlayıb.
Dekabr üçün müəyyənləşən siyahıda Azərbaycanın 8 şahmatçısı yer alıb.
Onlardan 5-i kişi qrossmeysterdir. Milli üzvlərindən ən yaxşı göstərici yenə Şəhriyar Məmmədyarova məxsusdur. 2772 xala malik 34 yaşlı qrossmeyster 7-ci yerdə qərarlaşıb.
Ötən ay yarışlara qatılmayan Teymur Rəcəbov mövqeyini əldən verib. O, 2765 xalla 9-cu pilləni 10-a dəyişib.
6 pillə irəliləyərək, 77-ci yerə qalxan Qədir Hüseynov 2666 xala malikdir. Digər milli üzvü Nicat Abasov da mövqeyini yaxşılaşdırıb. 11 rəqibini qabaqlayan şahmatçı 2663 xalla 82-ci yerdə qərarlaşıb.
Bir aylıq fasilədən sonra Rauf Məmmədov (2659) yenidən "100-lüy"ə qayıdıb. O, hazırda 89-cudur.
Bu siyahıda Maqnus Karlsen (Norveç, 2872) birinci, Fabiano Karuana (ABŞ, 2822) ikinci, Dinq Liren (Çin, 2801) üçüncüdür.
Qadınlar şahmatçılar arasında isə 3 təmsilçimiz yer alıb. Yığma üzvlərindən Günay Məmmədzadə (2455) 27-ci, Ülviyyə Fətəliyeva (2387) 76-cı və Gülnar Məmmədova (2386) 78-ci pillədədir. Onlardan fərqli, Xanım Balacayeva (2368) "100-lüy"ü tərk edib.
Qadın zəka sahiblərinin cədvəlində Yifan Hou (Çin, 2664) birincidir.(APA)
