Argentinalı Xerardo Martino Amerikanın “İnter Mayami” futbol klubunun baş məşqçisi təyin edilib.

Bu barədə çərşənbə günü klubun Mətbuat Xidməti məlumat yayıb.

Məşqçi ilə müqavilənin şərtləri barədə məlumat verilmir.

“Martino idmanımızda hörmətli şəxsiyyətdir və onun keçmişi öz sözünü deyir. Əminik ki, onun baş məşqçi kimi təcrübəsi və nailiyyətləri komandamızı ruhlandıracaq və azarkeşləri sevindirəcək”, - “İnter Mayami”nin sahibi Devid Bekhem deyib.

Qeyd edək ki, Martinonun 60 yaşı var və 2019-2022-ci illərdə Meksika millisinə rəhbərlik edib. O, əvvəllər İspaniyanın “Barselona”, həmçinin Paraqvay və Argentina yığmalarının da baş məşqçisi olub. Martino 2013-cü ildə “Barsa” ilə İspaniya Superkubokunu qazanıb. Meksika millisinə rəhbərlik edən Martino KONKAKAF Qızıl Kubokunu əldə edib, Argentina millisi ilə məşqçi iki dəfə Amerika Kubokunda gümüş medala layiq görülüb.

Mənbə: TASS