“Quranı tərcümə etmək çox uzun prosesdir. Adi bir tərcümə olsaydı, onu 1 ya da 2 aya başa çatdırmaq olardı. Amma Quranın tərcüməsinə çox ciddi əmək sərf olunmalıdır. Mən də yeni tərcümə üzərində işləyirəm”.
teref.az bildirir ki, bunu Modern.az-a açıqlamasında Quranın yeni tərcüməsi üzərində işləyən, ilahiyyatçı Elşad Miri deyib.
O bildirib ki, Qurani-Kərimin kiçik surələrinin izahlı şəkildə tərcüməsini yekunlaşdırıb. Elşad Miri qeyd edib ki, 4 cümləlik Quran ayəsini tərcümə etmək üçün bir aydan çox vaxt sərf edib.
“İndiyə qədər bilinən informasiyalar tamamilə səhv idi. Mən tərcümələr zamanı bir neçə mənbəni tutuşdururam. Hazırda bizdə tərcümə olunan Quran kitablarında ciddi boşluqlar var.
Bu günə qədər olanlar hamısı hərfi tərcümədir, eyni zamanda müəlliflər öz fikirlərini də qatıblar. Rəbbim ömür verərsə, bir neçə ilə mən Quranın tərcüməsini yekunlaşdırıb insanların ixtiyarına verəcəyəm”.
“Quranı tək tərcümə edirsiniz, yoxsa bir neçə nəfərlə birlikdə” sualına isə ilahiyyatçının cavabı belə olub:
“Bir neçə adamın müqəddəs kitabımızı tərcümə etmək təcrübəsi çox olub. Amma bu zaman ciddi üslub qüsurları, fikir ayrılıqları olub. Buna görə də oxucularda çaşqınlıq yaranırdı.
Bütün bunları nəzərə alıb mən tək tərcümə etməyə üstünlük verirəm. Amma müəyyən çətinliklərim olduğu zaman bu sahənin ən tanınmış alimlərinə internet vasitəsi ilə müraciət edirəm. Təəssüf ki, belə insan Azərbaycanda yoxdur”.
Din sahəsi üzrə ekspert tərcümədən sonra radikal düşüncədə olan insanların hücumuna hazır olduğunu da bildirib:
“Mən buna da hazıram. Çünki bu günə qədər etdiyim çıxışlardan sonra bunu müşahidə etmişəm. Məqsədim sensasiya yaratmaq deyil.
Əsas istəyim odur ki, Allahın endirdiyi dini insanlara düzgün çatdıraq. Təəssüf ki, bu gün bir çox insan Qurana uydurulmuş din rakursundan yanaşırlar”.