Zukerberqin sərvəti “Metaverse” istifadəyə verildikdən sonra altı dəfə artaraq 201 milyard dollara çatıb

Mark Zukerberq “Metaverse”nin yaradıldığını elan edərkən 100 milyard dollar itirmək riski ilə üzləşmişdi. Lakin indi bu ideya öz bəhrəsini verir – onun şirkətinin səhmləri rekord səviyyədə artıb.

AYNA-nın “Bloomberg”ə istinadən məlumatına görə, “Meta”nın yaradıcısı Mark Zukerberqin sərvəti “Metaverse” istifadəyə verildikdən sonra altı dəfə artaraq 201 milyard dollara çatıb.

Milyarderlər İndeksinə görə, Zukerberqin şəxsi sərvəti ilk dəfə olaraq 200 milyard dolları ötüb. O, “Tesla” və “SpaceX”in qurucusu İlon Mask, “Amazon”un qurucusu Ceff Bezos və LVMH qrupunun sahibi Bernard Arnaultdan sonra dünyanın 500 ən zəngin adamı siyahısında dördüncü yerə yüksəlib.

“Bloomberg” yazır ki, iş adamının sərvəti əsasən “Meta Platforms Inc.”in rekord yüksək səhm qiyməti sayəsində artıb. Buna görə də Zukerberqin xalis sərvəti iki ildən az müddətdə təxminən altı dəfə artıb.

İlin əvvəlindən bəri “Meta Platforms Inc.”in səhm qiyməti əvvəlki illə müqayisədə 60% artıb.

“Bloomberg” qeyd edir ki, Zukerberq “Meta Platforms Inc.”in 13%-nə sahibdir, ona görə də yanvarın 1-dən onun sərvəti 73,4 milyard dollar artıb. Nəşr xatırladır ki, Zukerberqin “Metaverse” yaratmaq və bütün məhsulları ona birləşdirmək niyyəti əvvəlcə səhmlərin kəskin azalmasına səbəb olub. Sonra Zukerberq kapitalının təxminən 100 milyard dollarını itirmək riski ilə üzləşib. “Metaverse”nin inkişafına başlayan iş adamının şirkəti immersiv məzmunun inkişafı da daxil olmaqla əhəmiyyətli investisiyalar yatırdı. “Facebook” sosial şəbəkəsi əsasında metaversenin yaradılması 2021-ci ilin iyulunda elan edilib. Həmin ilin oktyabrında onun sahibi olan “Facebook Inc.”, “Instagram”, “WhatsApp və digər xidmətlər “Meta” olaraq ad dəyişikliyi etdi.

“Metaverse” rəqəmsal dünyalar toplusuna aiddir. Söhbət virtual reallıq və əlavə reallıq texnologiyalarından istifadə edəcək məhsuldan gedir. Zukerberq onun inkişafının beş-on il çəkəcəyini proqnozlaşdırır.