Amerikalı milyarder adının “Epşteyn işi”ndə hallanmasına münasibət bildirib

Amerikalı milyarder, “Tesla”nın rəhbəri İlon Mask “Epşteyn işi”ndə adının çəkildiyi yeni açıqlanan sənədləri şərh edib. İş adamı cinsi cinayətə görə məhkum edilmiş maliyyəçinin onu adasına dəvət etdiyini təsdiqləyib.

AYNA.AZ bildirir ki, Mask “X” sosial media platformasında yazıb: “Epşteyn məni adasına getməyə məcbur etməyə çalışdı, lakin mən imtina etdim".

Mask əvvəllər dəfələrlə ABŞ hökumətini işlə bağlı bütün materialları açıqlamağa çağırıb.

Qeyd edək ki, Ceffri Epşteyn 2019-cu ildə yetkinlik yaşına çatmayanların seksual alverinə görə həbs edilib. Elə həmin il həbsxanada intihar edib. İttiham şahidləri iddia edirlər ki, o uşaqları öz adasında, Kiçik Sent Ceymsdə saxlayıb. Onun iş materiallarında adaya səfər etmiş ola biləcək Britaniya şahzadəsi Endryu da daxil olmaqla, həm amerikalılar, həm də əcnəbilər arasında bir çox nüfuzlu və məşhur şəxslərin adı çəkilir.