İcra Hakimiyyəti başçıları daim yerli medianın hədəfində olur. Elə bir icra hakimiyyəti başçısı tapılmaz ki, dövlət əmlakını dağıtmasın, rayonun abadlaşdırılması üçün dövlət büdcəsindən ayrılan vəsaitin yarısını öz hesabına yatırdmasın, özü, ailəsi və yaxınları üçün dəbdəbəli həyat qurmasın, başqalarının adına obyektləri, villaları olmasın və s…
Amma Laçın rayon İcra Hakimiyyətinin başçısı Akif Səlimov Laçına heç 3 il deyil ki, başçı təyin olunub, ayda 3 dəfə medianın hədəfindədir. Elə ilk aylardan bu şəxsdən narazılıqlar baş qaldırıb…
Avrasiya.net bu yazını yerli medianın A.Səlimovla bağlı laçınlılar tərəfindən edilən şikayətlər, iddialar və faktlar əsasında hazırlayıb. Od olmayan yerdən tüstü çıxmaz deyiblər. Mediada gedən yazılardan da görünür A.Səlimov rayona polis zabiti təcürbəsindən istifadə edərək “ağalıq” edir. Axı A.Səlimov Laçın, Goranboy, Qax və Cəlilabad rayon polis şöbələrini rəisi vəzifələrində çalışıb. Uzun müddət bu vəzifələrdə çalışan bir şəxsin birdən-birə icra başçısı səlahiyyətlərini humanistcəsinə yerinə yetirəcəyi bir qədər müəmmalı görünər. Axı təcrübədən də görünüb ki, əksər polis rəislərinin gözündə çoxu cinayətkar obrazında görünüb. A.Səlimovun da əhali ilə polis zabiti təcrübəsindən istifadə edib rəftarı ondan çoxsaylı şikayətlərlə nəticələnib.
Bizim üçün maraqlı olan bir məqam daha var. O da Səlimovla bağlı vaxtaşırı «O Qarabağda döyüşüb» ifadəsidir. Əvvəla Akif Səlimovun Qarabağda döyüşməsi onun mənəvi borcu idi. Bu Vətən təkcə onun deyil, hamımızın olduğundan onun dərdini də, sərini də biz çəkməyə borcluyuq. Səlimovun Qarabağda döyüşməsi də bizim üçün hər hansı bir üstünlük deyil. Bir də, Akif Səlimov Qarabağda döyüşüb deyə, hazırda icra başçısı olduğu Laçını talamalıdırmı? O Qarabağda döyüşüb deyə, rüşvətə, korrupsiyaya total şəkildə qapı açmalıdırmı? O Qarabağda döyüşüb deyə, Laçın camaatı əlindən zülm ayaqlamalıdırlar?
Digər bir düşündürücü sual da laçınlı olan bu şəxsin Laçında qəbul edilməməsidir. Niyə bu icra başçısı ilə bağlı mediamız bu qədər həyacan təbili çalır? Gəlin yazılanlara bir daha nəzər salaq. Sualın cavabını yazılardan, video və fotolardan tapmağa çalışaq.
İcra başçısı DSK sədrindən intiqam aldı
Mediamız icra hakimiyyəti başçısından yazıb ki, A.Səlimov başçı təyin olunandan qıza müddət sonra onun fəaliyyəti artıq laçınlılar arasında böyük narazılıqları yaranmasına səbəb olub. A.Səlimov Laçın RİH-nin yeni başçısı təyin olunduqdan dərhal sonra bu qurumun strukturunda əksər məsul postları tutan şəxsləri, o cümlədən hümanitar məsələlər üzrə müavin Bəsti Nəcəflini, aqrar məsələlər üzrə müavin S.Məmiyevi, ümumi şöbənin müdirü N.Nəcəfovu, RİH-nin komendantı Şakir İbrahimovu, Mədəniyyət və Turizm şöbəsinin müdiri İ.İlyasovu öz vəzifələrindən azad edib. Məlumatlarda bildirilir ki, həmin vəzifələrə Akif Səlimova yaxınlığı ilə seçilən kadrlar təyinat alıblar. Yerli mənbələr tərəfindən təqdim olunan məlumatlarda isə Akif Səlimovun yeni komanda yaratmaq üçün kadr seçimini məhz etnik mənsubiyyət kriteriləri əsasında həyata keçirdiyi iddia olunur.
Məlum olduğu kimi Azərbaycanda etnik mənsubiyyət zəminində vətəndaşlar arasında ayrı-seçkiliyə yol verilməsi olkə qanunları ilə qadağan olunub. Yerli mənbələrdən daxil olan başqa bir məlumatda isə Akif Səlimovun həm də vəzifə səlahiyyətlərindən sui-istifadə edərək, vətəndaşların hüquqlarının pozulması ilə müşayiət olunan qisasçılıq və əvəz çıxma kimi qeyri-etik davranış formalarına yol verdiyi bildirilir. Məsələn, qeyd olunur ki, 121 saylı Laçın Dairə Seçki Komissiyasının sədri Ş.Paşayevin bu vəzifədən kənarlaşdırılmasını yerli sakinlər artıq üç il davam edən ədavətin məntiqi nəticəsi kimi qiymətləndirirlər. Məlumatlara görə, 2010-cu ildə Akif Səlimov 121 saylı Seçki Dairəsindən Milli Məclisə deputat kimi öz namizədliyini irəli sürmüşdü. Bildirilir ki, həmin vaxt kifayət qədər səs toplaya bilməyən A.Səlimov buna görə məhz Laçın RİH-nin keçmiş icra başçısının və Dairə Seçki Komissiyasının sədrinin məsuliyyət daşımalı olduqlarına özünü inandırıb. İndi isə əlinə düşən imkandan istifadə edən başçı qısa müddətdə komissiya sədrinin dəyişdirilməsinə nail ola bilib.
Səlimovun bacanağı ermənidir? – İDDİA




Vaxtilə daxili işlər naziri işləmiş Tahir Əliyevin 1994-cü ildə Şuşanın və Laçının işğalı ilə bağlı aparılmış məhkəmə prosesində verdiyi ifadənin video yazısının mətbuatda ictimailəşdirilməsi də A.Səlimovun ermənilərlə qohum olması iddiasıdır. Tahir Əliyev ifadəsində hazırda Laçının icra başçısı işləyən, o zamanlarsa adı çəkilən rayonun polis rəisi çalışmış Akif Səlimov və keçmiş müdafiə naziri Rəhim Qazıyev haqqında təhqiramiz ifadələr işlədir. Həmçinin Akif Səlimovun bacanağının erməni olduğunu və Görusun polis rəisi işlədiyini bildirir.

Akif Səlimovun infarktının sirri
Qarabağ müharibəsi veteran Vahid Məmmədovun mediaya verdiyi açıqlama isə bomba kimi partladı.
O, bildirib ki, Akif Səlimov Laçın Rayon Polis Şöbəsinin rəisi vəzifəsindən azad edildikdən sonra 1994-cü ilin mart ayından 1996-cı ilin oktyabr ayınadək Goranboy Rayon Polis Şöbəsinin rəisi vəzifəsində işləmişdir. Həmin dövrdə Goranboy rayonu Əkbərovlar ailəsinin idarəçiliyində idi. Müstəqilliyin ilk illərindən 2000-ci ilin əvvələrinədək Ağa Əkbərov Goranboy rayon İcra Hakimiyyəti Başçısı vəzifəsində çalışmışdır. Rasim Əkbərov isə Goranboy rayonundakı “N” saylı hərbi hissənin komandiri və “Azərbaycanın Milli Qəhrəmanı” kimi yüksək statusa malik idi. Səlimovun keçmiş Milli Qəhrəman Rasim Əkbərovla dostluqu da Goranboyda işlədiyi dövrdən başlamışdır. A. Səlimov Əkbərovların Goranboyda bütün bəd əməllərindən xəbərdar olmaya bilməzdi. Goranboyu istədikləri kimi idarə edən Əkbərovlar, bu rayonun malını, sərvətini talan edirdilər və şübhəsiz ki, Akif Səlimov da onlara şərik idi. Beləliklə polkovniklərin dost olmalarına bir çox səbəb var idi və bu dostluq daha da güclənəməkdə idi . Goranboyda rəsilik etmək Səlimov üçün çox düşərli olmuşdur. Özünə xeyli var-dövlət toplamış, övladlarına o dövr üçün ən bahalı avtomobillər, evlər almışdır. Səlimovla Əkbərovu birləşdirən başqa dəyərlər də var idi. Hər ikisi Qarabağ müharibəsində iştirak etmişdir və komandir olmaları onların özbaşınalğına, vəzifələrindən sui-istifadə edərək korrupsiyaya qurşanmmalarına geniş yol açırdı.
Akif Səlimovun 1996-cı ilin oktyabr ayında Qax Rayon Polis Şöbəsinin rəisi təyin edilməsi Rasim Əkbərovla dost olmalarında heç bir soyuqluq yaratmamışdır. Dostluqu qohumluqla davam etdirmək istəyən polis rəisi oğluna Əkbərovlardan qız almaq ərəfəsində idi. Amma 2000-ci ildə gözlənilməz hadisələr baş verdi. 2000-ci illin əvvəllərində Goranboy rayon İcra Hakimiyyəti Başçısı Ağa Əkbərov və onun oğlu, Azərbaycanın Milli Qəhrəmanı polkovnik Rasim Əkbərov dövlət çevrilişinə cəhddə ittiham olunaraq həbs olundu. Vətənə xəyanət, vəzifə səlahiyyətlərini aşma, qanunsuz silah saxlama ilə həbs edilən Əkbərovların taleyi Səlimovun səhətinin pisləşməsinə səbəb oldu. Ata-oğulun həbs edilməsi Akif Səlimovu rahatsız etməyə bilməzdi. Çünki onların törətdikləri bir sıra cinayətlərdə özünün ifşa olacağından qorxurdu. Özünün də həbs olunacağını gözləyən Akif Səlimov stres keçirdərək infarkt oldu. Həmişə bütün çətin vəziyyətlərdən məharətlə çıxmağı bacaran Akif Səlimov, Əkbərovları aparan selin axınından da çıxmağı bacara bildi. Həmin dövrdə Respublika rəhbərliyində güclü havadarlarının olması polkovnikin gələcəkdə icra başçısı pilləsinə qədər yüksəlməsinə yol açdı. Əgər Akif Səlimov bütün bu faktları inkar etmək istəyərsə, Daxili İşlər Nazirliyinin hospitalında onun 2000-ci ildə infarkt olması barədə xəstəlik tarixçəsinin mövcud olmasını unutmasın”.
(Davamı var)