Adı bir sıra xoşagəlməz işlərdə hallandırılan Sevinc Budaqova ilə bağlı yeni faktlar üzə çıxıb Paytaxtın Nəsimi rayonunda yerləşən 46 nömrəli tam orta məktəbin direktoru Sevinc Budaqova ilə bağlı gundelik-baku.com saytının redaksiyasına yeni məlumatlar daxil olub. Adının gizli qalmasını xahiş edən şəxsin bildirdiyinə görə, məktəbdə təhsilin səviyyəsini xeyli aşağı salan, şagirdlər arasında nizam-intizam yarada bilməyən direktor ancaq şəxsi işləri ilə maraqlanır: «Onun məktəbdən demək olar ki, xəbəri yoxdur. Bütün işləri təlim-tərbiyə işləri üzrə müavini İlyas Məmmədova həvalə edib. İlyas müəllim isə bu gün-səhər pensiyaya çıxacaq. Yəni onun yaşı normal işləməsinə imkan vermir. Bu səbəbdən məktəbdə tədrisin keyfiyyəti ildən-ilə aşağı düşür. Sevinc xanımın əsas işi müxtəlif bəhanələrlə şagirdlərdən pul yığıb istirahət etməkdən ibarətdir. O il ərzində ən azı 3-4 dəfə müalicə adı altında xarici ölkələrə istirahətə gedir. Məsələn, bir müddət əvvəl İstanbul və Minvodda dincəlib. Yəqin ki, yaxın günlərdə yenidən hansısa ölkəyə tətilə gedəcək. Azərbaycan müəlliminin maddi sıxıntı içərisində yaşadığı, maaşların artırılması ilə bağlı tələblərin səsləndirildiyi bir vaxtda, 46 nömrəli orta məktəbin direktoru istirahətə hansı pulla gedir? Məktəb rəhbərinin aylıq maaşı 450 manatdan yuxarı deyil. Buna baxmayaraq, direktor il ərzində bir neçə dəfə xaricə gedir. Maraqlıdır, onun maliyyəsi haradandır, hansı pullarla istirahətə gedir?». Bu arada, onu da nəzərinizə çatdırmaq istəyirik ki, gundelik-baku.com-un 46 nömrəli orta məktəbdəki neqativ işləri ictimailəşdirməsindən sonra Sevinc Budaqova, eləcə də onunla yaxın münasibətləri olan baş redaktorlardan biri bərk narahat olmağa başlayıb. Ki, bu haqda yaxın günlərdə daha ətraflı məlumat verəcəyik. Həmçinin məktəb direktorunun hansı zərərli vərdişinin olmasını biləcəksiniz. Qarşı tərəfin də cavab haqqını tanıyırıq.