Amerika rəsmiləri hesab edirlər ki, yaxın 24-48 saat İran ətrafındakı vəziyyət üçün həlledici olacaq, çünki bu müddət ərzində Vaşinqtonun İsrailin hərbi əməliyyatlarına qoşulması ilə bağlı qərar verilə bilər.

Bu barədə ABC News telekanalı məlumat yayıb.

Qeyd olunur ki, bu müddət ərzində Vaşinqton İranla münaqişənin diplomatik yolla həllinin mümkün olub-olmamasına, yaxud ABŞ Prezidenti Donald Tramp hərbi əməliyyatlara əl atmağa qərar verə bilər. Telekanalın mənbələrinin bildirdiyinə görə, ABŞ hələ də Tehranı danışıqlar masasına qaytara və uranın zənginləşdirilməsindən tam imtinanı nəzərdə tutan sazişi imzalamağa məcbur edə biləcəyinə inanır.

Bu ilin aprelindən İran və ABŞ Omanın vasitəçiliyi ilə Tehranın nüvə proqramı ətrafında yaranmış vəziyyəti həll etmək üçün dolayı danışıqlar aparırlar. Yeni razılaşma əldə etmək üçün edilən bir neçə cəhddən sonra uranın zənginləşdirilməsi ilə bağlı fikir ayrılıqları səbəbindən məsləhətləşmələr kəsilmə təhlükəsi ilə üzləşdi. İki nümayəndə heyəti arasında danışıqların altıncı raundu iyunun 15-də Maskatda keçirilməli idi, lakin İsrailin İrana hücumundan sonra məsləhətləşmələr ləğv edildi.

Qeyd edək ki, iyunun 13-də gecə saatlarında İsrail İranın bir sıra nüvə obyektlərinə və paytaxt Tehrana zərbələr endirib. Bir neçə yüksəkvəzifəli hərbçi və nüvə alimləri həlak olublar. Eskalasiya hələ də davam edir.