Rusiya-Ukrayna müharibəsinin 61-ci gününü yaşayırıq. Bu müddət ərzində hər iki ölkə xeyli sayda itki verib. Lakin müharibə hələ də davam etməkdədir.

Son vəziyyətlə bağlı Bizim.Media-nın suallarını bu dəfə Ukrayna Ali Radasının deputatı, “Xalqın xidmətçisi” parlament fraksiyasının təmsilçisi Lyudmila Marçenko cavablandırıb.

Sözügedən müsahibəni təqdim edirik:

- Xanım Marçenko, biz bilirik ki, Ukraynanın mübarizəsi davam edir. Bir çox ölkələr də Ukraynanı dəstəkləyir. Müharibənin hazırkı vəziyyətini necə qiymətləndirərdiniz?

- Ukrayna güclü ölkədir! Bütün dünya bunu artıq görüb! Biz bu müharibədə qalib gəlirik və qalib də çıxacağıq! Mən hərbi strateq deyiləm, bizdə ölkə rəhbərliyi və bütün hərbi əməliyyatların rəhbərləri işlərini görürlər. Onlar işlərini 100% görürlər və yalnız onlar hazırki vəziyyətə düzgün qiymət verə bilərlər. Mən öz növbəmdə Ukrayna Silahlı Qüvvələrinin gücünü, Ukrayna xalqının birliyini görürəm ki, onları sındırmaq və məğlub etmək mümkün deyil. Biz Müstəqillik və Azadlıq uğrunda mübarizə aparırıq. Bunu sizdən yaxşı kim bilə bilər ki?!

Mən bir xalq deputatı kimi qanunvericilik sahəsində, millətlərarası dostluq qruplarında fəaliyyətimi davam etdirirəm və ehtiyacı olan hər kəsə, istər təxliyə edilənlərə, istərsə də atəşə məruz qalanlara, uşaqlara, qocalara hər cür köməklik göstərirəm.

- Bir çox ölkələr Ukrayna hökumətinə yardımlar edir. Bu yardımlar ölkəyə çatırmı?

- Bəli, bütün yardımlar çatır və ehtiyacı olanlara tez paylanır. Şəxsən mən də humanitar yardımın axtarışı, çatdırılması və 15-dən çox ölkə ilə danışıqlarda iştirak edirəm.

- Müharibənin sonunu necə görürsünüz? Sizin bu istiqamətdə düşüncənizi öyrənmək istəyərdim.

- Ukraynanın Qələbəsi!!! Bizi dəstəkləyənlərin sayı günbəgün artır. Son mətbuat konfransında prezidentimiz Zelenski də bunu qeyd etdi: “Türkiyə vasitəçi olmağa hazır olan ölkələr arasında lider olmaq istədiyini göstərir. Türkiyə açıq şəkildə bəyan edir ki, təhlükəsizliyin təminatçıları arasında olacaq və olmaq istəyir. Prezident Əliyev də həmişə Ukraynanı dəstəkləyib. Humanitar yardım oldu, tibbi yardım oldu. Düşünürəm ki, bu gün Azərbaycan üçün Ukraynaya kömək etmək silah baxımından çətindir. Bunu başa düşmək olar, çünki onların Dağlıq Qarabağı var”. Bunu prezidentimiz açıq şəkildə dedi. Bəli, biz daha çox dəstək istəyirik, amma gerçəkləri də nəzərə alırıq.

- Xanım Marçenka, suallarımızı cavablandırdığınız üçün təşəkkür edirəm.

- Mən də sizə dəstəyiniz üçün təşəkkür edirəm.

Tehran, Bizim.Media