Vaşinqtonun Suriyada əməkdaşlıq təklifi düzgün istiqamətdə atılmış addımdır, ancaq ABŞ-ın bu ölkədə qeyri-uçuş zonaları yaratmaqla bağlı təklifinə dair əlavə bilgiyə ehtiyac var.

Bunu Rusiyanın xarici işlər naziri Sergei Lavrov deyib.

«Soruşmuşuq, ancaq qeyri-uçuş zonalarının nəyi ehtiva etməsi barədə sualımıza cavab ala bilməmişik, bu haqda danışıq olmayıb», – Lavrov iyulun 6-da Parisə səfəri zamanı deyib.

Rusiya hazırda İran və Türkiyəylə birlikdə dörd «de-eskalasiya zonası»nın yaranması planını gerçəkləşdirməyə çalışır. Həmin zonalarda hava zərbələrinin dayandırılması nəzərdə tutulur.

ABŞ dövlət katibi Rex Tillerson iyulun 5-də deyib ki, Birləşmiş Ştatlar qeyri-uçuş zonaları da daxil olmaqla, sabitliyin təminatından ötrü birgə mexanizmlər yaradılması ehtimalını araşdırmağa hazırdır.

Bu gün –iyulun 7-də ABŞ və Rusiya prezidentləri Hamburqda görüşməlidir.

ABŞ prezidenti Donald Trump vəzifəyə keçəndən az sonra demişdi ki, Suriyada «təhlükəsiz zona»ların yaradılmasını istəyir. Ancaq o, detallı plan irəli sürməyib.