Ötən gün İstanbulda Türkiyə Böyük Millət Məclisinin (parlament) bir qrupu millət vəkili Azərbaycan Milli Məclisinin deputatı Flora Qasımova ilə görüşüblər.

Modern.az saytının məlumatına görə görüşdə qondarma erməni soyqırımı, Türkiyə-Ermənistan məsələsi müzakirə edilib. Milli Məclisin deputatı Flora Qasımova çıxışında deyib ki, hazırda Türkiyə Ermənistanla bağlı siyasətində sərt mövqe nümayiş etdirmir. “Türkiyənin Ermənistan məsələsində yumşaq mövqedə olması əlavə problemlərə yol açacaq”,-deyə Flora Qasımova bildirib.

Deputat qeyd edib ki, Türkiyənin Ermənistandan gələn vətəndaşlara əlavə imtiyazlar tanıması bu ölkədə ciddi problemlərə, hətta terror təhlükəsinə gətirib çıxara bilər.

“Bununla da Türkiyədə ikinci PKK cəbhəsi açıla bilər. Yeni erməni təhlükəsi hətta PKK-dan da ciddi təhlükə mənbəyinə çevrilə bilər”,-deyə o əlavə edib.