Hurriyyet.org xəbər verir ki, Ermənistanın Baş naziri vəzifəsini icra edən Nikol Paşinyan “Qazprom Ermənistan” (Rusiyanın “Qazprom” Açıq Səhmdar Cəmiyyətinin müəssisəsi) şirkətinin rəhbərliyini öz əməkdaşlarını etiraz aksiyalarında iştiraka məcbur eləməkdə ittiham edib.

Paşinyanın sözlərinə görə, hələlik bu məlumatlar qəti şəkildə təsdiqlənməsə də, hakimiyyət əsaslı dəlillər əldə edəcəyi təqdirdə, təşəbbüskarlar barəsində cinayət işi açıla bilər. Paşinyan deyib: “Başa düşmürəm, “Qazprom Ermənistan” Ermənistan xalqının və hökumətinin əleyhinə necə işləyə bilər? Bunu ağlınıza da gətirməməyiniz üçün, sizi dəstə-dəstə, qrup-qrup mühakimə edəcəklər”.

O əlavə edib ki, müəssisənin kütləvi etirazlarda yaxalanan istənilən işçisi dərhal işdən çıxarılacaq. Şirkətin özü üçün isə belə işlərin “çox ağır nəticələri olacaq”.