Əfqanıstanın Baqram və Pul-e-Çarxi həbsxanalarında cəza çəkən 1800 İŞİD yaraqlısı azadlığa buraxılıb.

Bunu Daşkənddə keçirilən beynəlxalq konfransda “Taliban”ın xarici işlər naziri Əmirxan Müttəki çıxışı zamanı deyib.

Onun sözlərinə görə, İŞİD üzvləri Əfqanıstanın şimalındakı Cövzcan vilayətində “Taliban” tərəfindən mühasirəyə alınanda əvvəlki administrasiya onları təyyarə ilə Kabilə aparıb. O, daha sonra iddia edib ki, əvvəlki 11 ay ərzində eyni İŞİD Əfqanıstanda iğtişaşlar törədirdi.

Bundan əvvəl ABŞ rəsmiləri hətta “Taliban”ın ekstremist islamçı İŞİD məhbuslarını Pul-e-Çarxi və Baqram həbsxanalarından azad etməsinin qruplaşmanı gücləndirdiyini bildirib.

Keçən il hər əyalətə nəzarəti ələ keçirdikdən sonra “Taliban” bütün məhbusları əfv edib. Bu qrup Kabili ələ keçirərkən Əfqanıstandakı bütün təcridxanalar boşalıb.

“Taliban” İŞİD-in Əfqanıstanda fiziki olaraq mövcud olmadığını və təhlükə yaratmadığını dəfələrlə vurğulasa da, “Taliban” nəzarəti ələ keçirdikdən sonra İŞİD məscidlərə, məktəblərə və avtomobillərə edilən ölümcül hücumlara görə məsuliyyəti öz üzərinə götürüb.