ABŞ-nin 16 ştatında və Amerikan Samoasında “super çərşənbə axşamı” prezidentlik yarışları yekunlaşır.

Seçkilərdə həm respublikaçı, həm də demokrat namizədlər öz partiyalarından olan nümayəndələrin üçdə biri uğrunda yarışırlar.

Yerli medianın sorğusuna əsasən ABŞ-ın keçmiş prezidenti Donald Tramp 11 ştatda keçirilən partiyadaxili seçkilərdə (praymeriz) qalib gəlir.

“Associated Press”in məlumatına görə, Alabamada Ağ Evin keçmiş rəhbəri ilk hesablanmış səslərin 85,6%-ni, Massaçusetsdə isə 61,7%-ni toplayır. Bu iki ştatda agentlik siyasətçinin qələbəsini proqnozlaşdırır.

“NYT”nin proqnozuna görə, Tramp hakimiyyətin onu iştirakdan kənarlaşdırmağa çalışdığı Kolorado ştatında keçirilən praymerizdə də üstün olacaq.

“NBC”nin məlumatına görə, keçmiş Amerika lideri Texasda keçirilən praymerizdə də qalib gəlir. Orada o, 161 nümayəndənin dəstəyini qazana bilib ki, bu da onun digər ştatlarla müqayisədə ən mühüm qələbəsidir.

Öz növbəsində ABŞ prezidenti Co Bayden səsvermənin başa çatdığı 11 ştatın hamısında inamla qalib gəlir.