Almaniyanın Lufthansa aviaşirkəti cümə axşamı bildirib ki, ən azı avqustun 8-dək İsrailə və İsraildən bütün sərnişin və yük reyslərini ləğv edir.

Lufthansa sözçüsü uçuşların dayandırılmasını "bölgədəki hazırkı vəziyyətlə" izah edərək, Beyruta və Beyrutdan uçuşların dayandırılmasını avqustun 12-dək uzaddığını bildirib.

Bölgədə gərginliyin artması ilə əlaqədar bir sıra aviaşirkət Yaxın Şərqə uçuşları dayandırıb.

Livan şənbə günü İsrailin işğalı altında olan Qolan təpələrində 12 uşaq və yeniyetmənin ölümünə səbəb olan hücumdan sonra İsraildən gözlənilən cavab tədbirləri görməyə hazırlaşır.

Livanın "Hizbullah" silahlı qruplaşması hücumda əli olduğunu inkar edir.

Lufthansa Qrupunun elanı ABŞ-ın Livandakı səfirliyinin 4-cü Səviyyə: Səyahət etməmə tövsiyəsindən bir gün sonraya təsadüf edir.

Qərb hökumətləri İsrail və İranın dəstəklədiyi Hizbullah yaraqlıları arasında gərginliyin artdığı bir vaxt öz vətəndaşlarını Livanı tərk etməyə çağırıb.