Rusiya əsas məqsədinə - Ukraynanı tam işğal etməyə nail olmayıb və artıq işğal olunmuş əraziləri ilhaq etməyə hazırlaşır. “Censor.NET” xəbər verir ki, bu barədə Ukrayna Müdafiə Nazirliyinin Baş Kəşfiyyat İdarəsinin nümayəndəsi Vadim Skibitski açıqlama verib.

"Rusiya ərazimizin tam işğalı ilə bağlı strateji məqsədinə nail olmayıb. İkincisi, biz aydın görürük və məlumatlara sahibik ki, hazırda Rusiya Federasiyası işğal edilən ərazilərdə qanunverici orqan, hökumət və digər strukturları ilə bağlı bütün məsələlər üzərində fəal işləyir. Məqsəd müvəqqəti olaraq işğal olunmuş ərazilərin Rusiya Federasiyasına siyasi, iqtisadi və ərazi baxımından mümkün inteqrasiyasıdır. Bunun necə olacağını payıza yaxın görəcəyik. 11 sentyabr vahid səsvermə günüdür", - deyə o bildirib.

Bununla belə, Skibitskinin sözlərinə görə, Rusiyanın Donetsk, Xerson, Luqansk vilayətlərində həyata keçirdiyi tədbirlər qondarma “referendum”lara sistemli şəkildə hazırlığından xəbər verir: “Rusiyada qanunvericilik təşəbbüsləri hazırlanır ki, bu da Rusiya Federasiyasına inteqrasiya və ya əraziyə qoşulmaq üçün vətəndaşlığın alınması prosedurunu sadələşdirməlidir” .

Moskva Ukraynanın bu regionlarının ilhaqına nə dərəcədə ciddi hazırlaşa bilər? Aydındır ki, 2014-cü ildə Krımda olduğu kimi, dünyada heç kim onlar üçün bu yeni qeyri-qanuni statusu tanımır. Onda atılan addımların nə mənası var? DİA.AZ xəbər verir ki, baş verənləri AYNA-ya ukraynalı politoloq, “Penta” Siyasi Araşdırmalar Mərkəzinin direktoru Volodimir Fesenko şərh edib:

“Bu, Rusiya tərəfindən indiyə qədər qeyri-rəsmi şəkildə həyata keçirilən real plandır. İstənilən halda onlar artıq öz məmurlarını işğal etdikləri əraziləri idarə etmək üçün təyin edirlər. Paralel olaraq, onlar qarşıdan gələn ilhaq üçün prosedurlar müəyyən edilir. Xüsusilə, bəzi məlumatlara görə, qondarma “DXR” və “LXR”-də və Xerson vilayətinin işğal olunmuş ərazisində Rusiya Federasiyasına birləşmək üçün referendumlara hazırlıq artıq aparılır.

Doğrudan da, dünyada demək olar ki, heç kim bunu rəsmi olaraq tanımır. Hətta, Rusiyanın ən yaxın müttəfiqləri də “DXR” və “LXR” adlanan qurumları tanımır. Hərbi yolla ələ keçirilən ərazilərin Rusiyaya birləşdirilməsi isə ən təhlükəli presedentdir.

Amma Kremlin vecinə deyil. Putin ilk növbədə ruslara, həm də bütün dünyaya nümayiş etdirmək istəyir ki, Rusiya, guya, öz tarixi torpaqlarını geri qaytarır. Rusiya lideri Rusiya imperiyasının “böyüklüyünü” bərpa edərək tarixdə “rus torpaqlarının yığıcısı” kimi qalmaq istəyir. Və təsadüfi deyil ki, o, özünü Böyük Pyotrla müqayisə edir. Bu, Putinin imperiya maniyasıdır.

Dünyanın qalan hissəsinə gəlincə, Kreml göstərmək istəyir ki, Rusiya üçün heç bir məhdudiyyət yoxdur və Rusiya hakimiyyəti öz bildiyi kimi hərəkət edəcək. Eyni zamanda, Kreml ümid edir ki, dünyanın qalan hissəsi Rusiya Federasiyasının tərkibinə daxil olmasını rəsmən tanımasa belə, işğal olunmuş ərazilərin ilhaqı ilə de-fakto tədricən razılaşacaq.

Bu cür adddımlarda başqa bir məqam müharibəni dayandırmaq üçün Ukrayna ilə gələcək danışıqlara formal hüquqi tramplin yaratmaqdır. Putin Ukraynanın işğal olunmuş ərazilərini qaytarmaq niyyətində deyil və onların Rusiya Federasiyasına daxil olması faktının özü onların Ukraynanın nəzarəti altına qaytarılmasının mümkünsüzlüyü ilə bağlı arqument kimi istifadə olunacaq.

Amma Ukrayna Krım məsələsində olduğu kimi, belə məntiqi qəbul etməyəcək. Ona görə də Ukrayna işğal edilmiş ərazilərinin müxtəlif, o cümlədən hərbi yolla geri qaytarılması üçün mübarizə aparacaq”.