Xəbər verdiyimiz kimi, Bakıda fəaliyyət göstərən “Mado” restoranlar şəbəkəsinin “Gənclik Mall” filialında uşağı üçün yemək sifariş edən valideyn xoşagəlməz halla qarşılaşıb. Sosial şəbəkədə paylaşım edən vətəndaş bildirib ki, övladına uşaqlar üçün nəzərdə tutulan hamburqer alıb. Azyaşlı qız sifarişin yarıdan çoxunu yeyəndən sonra yeməyin içindən qığırdağa bənzər hissəcik çıxıb.
Valideynin paylaşımı sosial şəbəkədə geniş müzakirələrə səbəb olub. Bəzi istifadəçilər hadisənin “Mado”ya qarşı təxribat ola biləcəyini, hamburqer çörəyinin isə adi zavod çörəyi olduğunu bildiriblər.
Lakin adının çəkilməsini istəməyən valideyn saytımıza açıqlamasında bu iddiaların əsassız olduğunu vurğulayıb və dediklərini təsdiq edən bir neçə foto təqdim edib.
“Bəlkə də onu yazanlar "Mado"nun işçiləridir. Bu şəkilləri göndərirəm ki, hər kəs görsün”, - deyə valideyn vurğulayıb.
Qeyd edək ki, Azərbaycan Qida Təhlükəsizliyi Agentliyi məsələni nəzarətə götürüb, araşdırma aparılır.
“Mado”dan isə hələlik məsələyə münasibət bildirilməyib.
Bakupost.az