Bir əfqan yeniyetmə təyyarənin təkər yuvasında (şassi) gizlənərək Hindistana son dərəcə təhlükəli bir səyahətdən möcüzəvi şəkildə sağ çıxıb, amma iki saatdan sonra geri göndərilib.

Bizim.Media xəbər verir ki, bu barədə “independent.co.uk” nəşri yazıb.
Kunduzdan olan 13 yaşlı oğlanın üzərində yalnız qırmızı rəngdə bir portativ səsucaldana bənzər əşya olub. O, bazar günü səhər Kabil hava limanına gizlicə daxil olaraq Kam Air aviaşirkətinə məxsus təyyarənin arxa şassisinə girib.

Xəbərlərə görə, o, İrana getmək istəyirmiş, lakin səhvən Nyu-Dehliyə uçan təyyarəyə minib. Təyyarə yerli vaxtla səhər saat 10:20-də Nyu-Dehli beynəlxalq hava limanına enib.

Oğlan 94 dəqiqəlik uçuşu xəsarətsiz keçirib.

Terminal 3-ün məhdud ərazisində gəzərkən aviaşirkət işçiləri onu görüblər. Daha sonra Mərkəzi Sənaye Təhlükəsizlik Qüvvələrinə təhvil verilib və immiqrasiya orqanları tərəfindən dindirilib.

“Təyyarənin təhlükəsizlik və texniki personalı tərəfindən aparılan yoxlama zamanı arxa şassi bölməsində qırmızı rəngli səsucaldan tapılıb,” – təhlükəsizlik qurumu açıqlama yayıb.

Oğlan bildirib ki, Kabil hava limanına gizlicə daxil olub, sərnişinlərin ardınca hərəkət edib və təsadüfən təyyarənin arxa şassi bölməsinə girməyə nail olub.

O, eyni Kam Air təyyarəsi ilə saat 12:30-da Kabilə geri göndərilib.