Son günlər mətbuatın gündəmindən düşməyən azərbaycanlı kriminal avtoritet Lotu Qulinin yeni görüntüsü yayılıb.

GoldNews.az xəbər verir ki, avtoritet iş otağında qardaşı ilə foto çəkdirərək, şəxsi İnstagram hesabında paylaşıb. O, hər kəsə salam göndərib.

Qeyd edək ki,Türkiyə polisi ötən ilin dekabrında İstanbulda öldürülən "Dato Pankisski" ləqəbli "qanuni oğru" David Alxanaşvilinin qatilinin izinə düşüb.

İstintaq zamanı onun qətlini erməni kriminal avtoritet Andranik Soqoyanın cinayətkar aləmin daha bir üzvü Dato Ozmanovun göstərişi ilə təşkil etdiyi məlum olub.

Daha əvvəl bu cinayətin "Lotu Quli" ləqəbli azərbaycanlı Nadir Səlifov tərəfindən sifariş edildiyi bildirilsə də, sonradan bu versiya istisna edilib.

Yeri gəlmişkən "Lotu Quli"nin Rövşən Lənkəranskinin qardaşı, keçmiş gömrük polkovniki Namiq Caniyev və Hacı Beyləqanskinin əleyhinə ifadə verməkdən imtinasından sonra adı çəkilən şəxslər azadlığa buraxılıb. Bundan sonra "Lotu Quli"nin həyatına təhlükə yaranıb.

Ötən həftə isə onu aradan götürməkdə maraqlı olan şəxslər - Namiq Caniyev, Zaur Əhmədov və Dato Ozmanov arasındakı görüşdə "Lotu Quli"nin qətli müzakirə edilib.

Qeyd edək ki, "Dato Pankisski"nin qətlini təşkil etməsindən sonra Nadir Səlifovu aradan götürülməsinin də Zaur Əhmədova tapşırılacağı barədə xəbərlər yayılıb.