Son günlərdə Azərbaycan güləşi ətrafında gedən problemlərə daha biri əlavə olunub. “Qafqazinfo” xəbər verir ki, bu dəfə problem yeniyetmələr komandasında baş verib.

Belə ki, 63 kq çəki dərəcəsində güləşçi Cavadov Cavidanın şəxsi çalışdırıcısı Aydın Süleymanov saytımıza müraciət edərək yunan-Roma güləşi üzrə milli komandanın baş məşqçisi Bəhram Mürvətovdan şikayətçi olduğunu bildirib. Onun sözlərinə görə yığmanın çalışdırıcısı yetirməsinə qarşı haqsızlıq edib: “Gənclər arasında Avropa çempionatı olacaqdı. Ondan öncə turnirlər var idi.

Cavidan da həmin turnirlərə qatılacaqdı. Çünki orada uğurlu çıxış edənlər qitə birinciliyinə yollanacaqdı. Cavidan beynəlxalq turnirlərdə qızıl medal qazandı, Azərbaycan Güləş Federasiyası kubokunda birinci oldu. Amma Avropa birinciliyinə Vəfadar Cəfərovu apardılar. O da getdi uduzdu. Dedilər ki, Cavidanı dünya çempionatına aparacağıq. Amma sentyabrın 2-də dünya çempionatı başlayacaq. Dünya birinciliyinə az qalıb. Bunlar isə lipa olan Vahid adlı bir idmançını ora hazırlayırdılar. Lakin bu idmançı gedib beynəlxalq turnirləri uduzdu. Ona görə də məcbur indi başqasını hazırlamaq istəyirlər. Niyə uğur qazanan idmançıları yox, onları aparırlar?”.

Aydın Süleymanov Bəhram Mürvətovla bu mövzuda danışdığını da sözlərinə əlavə edib: “Getdim, Bəhramdan bu elədiklərini soruşdum. Dedim ki, bu uşaq çempion olur, medal qazanır amma kənarda qalır. Hansı ki, Cavidanın 8:0 udduğu iranlı idmançı həmin Avropa çempionatına gedən Vəfadı təmiz qələbə ilə udmuşdu. Mənə cavabı bu oldu: mən yaxşı edirəm. Ürəyim kimi istəyir onu da yarışa aparıram. Çempionatda birinci, ikinci, üçüncü yer tutanın deyil, ürəyim istəyən idmançının adını siyahıya salacam. İndi siz məni başa düşürsünüz? Belə şey olmaz. Haqsızlıq edirlər”.