Şəmkirin icra başçısı Alimpaşa Məmmədov rayona gəldiyi gündən qeyri-adi hərəkətləriylə mətbuatın gündəmindən düşmür. Onun adı gah 250000 manatlıq şou-proqramlarda, gah ölkənin müdafiə naziri tərəfindən döyülmədə, gah da rayonda keçirilən Beynəlxalq Şahmat Turnirində gülünc doğuran hərəkətlərdə hallanıb.

Bu gün isə icra başçısı haqda daha bir maraqlı məlumat yayılıb.

Dia.az veteninfo.az-ya istinadən xəbər verir ki, Şəmkirin polis rəisi Şükür Mehdiyevin qəfl işdən azad olunması təsadüf olmayıb. Belə ki, polis rəisi Şükür Mehdiyev məhz Alimpaşa Məmmədovla aralarında olan ciddi konfliktə görə işdən kənarlaşdırılıb. Belə ki, yeni icra başçısı təyinatının ilk günündən rəisə "göz verib işıq verməyib" və rayona öz kadrının gətirilməsini istəyib:

"İcra başçısı Alimpaşa Məmmədov hər fürsətdə polis rəisini gözdən salmağa cəhd edib. Sonuncu hadisə zamanı isə əsəblər tab gətirməyib. Və rəis başçının özərinə hücüm çəkib. Hadisə isə belə olub. Belə ki, 14 aprel tarixində İcra Hakimiyyətinin iclas zalında toplantı olmalıymış. Başçı adətinə uyğun yubanıb. Bu vaxt ərzində isə hamı sərbəst şəkildə biri-biriylə söhbətləşirmiş. Qəfil zala daxil olan Alimpaşa Məmmədov onun zala daxil olmasından bixəbər olan rəisə "Bu nə oturuşdu? Ayağını aşağı sal ə. bardeldə deyilsən"- deyir. Alimpaşa Məmmədovun hərəkətlərindənm cana yığılmış rəisin əsəbləri bu dəfə dözmür. Və o, yerindən duraraq Alimpaşa Məmmədovun yaxasından tutur. "Bu nə danışıqdır?Kimsən ki sən? Dünənə qədər rayonun bardürlərini kraskalayan olubsan da,.." - deyir".

Mənbə bildirir ki, rayon prokuroru Allahverdi Novruzovun araya girməsindən sonra başçı yaxasını polis rəisinin əllərində qurtara bilib: "Bundan sonra Şükür Mehdiyev hadisə barədə rəhbərliyə məruzə edərək işdən azad olunmasını xahiş edib. Aprelin 16-da o, işdən azad olunaraq sərəncama götürülür. May ayının 4-də isə Oğuz Polis Şöbəsinin rəisi Cəmil Əmirov Şəmkir Polis bölməsinə rəis gətirilir. Cəmil Əmirov isə Alimpaşanın köhnə dostu- Vergilər nazirinin birinci müavini Natiq Əmirovun qardaşıdır".

Məsələ ilə bağlı əlaqə saxladımız tərəflərin heç biri faktı inkar etmədi. Belə ki, Şəmkirin icra başçısının köməkçisi Mahir Əliyev bizlə telefon söhbətində məsələ ilə bağlı heç nə deyə bilməyəcəyini və icra başçısının humanitar məsələlər üzrə müavini ilə danışmağımızı istədi. Alimpaşa Məmmədovun müavini ilə telefonla danışmaq cəhdlərimiz nəticəsiz qaldı...

Daxili İşlər Nazirliyinin mətbuat xidmətinin əməkdaşı Orxan Mansurzadə polis rəisinin icra başçısı ilə konflikt yaşaması barədə deyilənlərə şərh vermək istəmədiyini deməklə yanaşı, qeyd etdi ki, Şükür Mehdiyev artıq Baş Narkotiklərlə Mübarizə İdarəsinin rəis müavini təyin olunub.