Tarif Şurası apteklərdə satılan bəzi dərmanların qiymətləri ilə bağlı yeni qərar qəbul edib. 187 dərmanın qiymətinin yuxarı həddi təsdiqlənib, 8 dərmanın qiyməti isə aşağı salınıb. Həmçinin 46 dərmanın qiymətində dəyişiklik edilib. Yeni qiymətlər 5 aprel 2025-ci ildən qüvvəyə minəcək. Dərmanların qiymətinin tənzimlənməsi əhalinin sosial vəziyyətinə necə təsir göstərə bilər? Qiymət dəyişikliyinin əsas səbəbləri nədir?

Məsələ ilə bağlı Tribunainfo.az-a açıqlama verən iqtisadçı ekspert Günay Hüseynova bildirib ki,
Tarif Şurasının bu qərarını qiymət artımı və ya azaldılması kimi qəbul etmək düzgün deyil. Yeni alınan dərman vasitələrinin qiymətlərinin təsdiqlənməsi, qiymətlərin artırılması kimi başa düşülməməlidir.

Məsələni sadə vətəndaşların da anlaya biləcəyi şəkildə izah etsək, nümunə olaraq, hər hansı bir dərmanın ilk dəfə idxal edildiyini götürək. Bu dərmanların siyahısı Tarif Şurasına təqdim olunur və Şura müəyyən qiymət təyin edərək yuxarı həddini müəyyənləşdirir. Bununla yanaşı, bəzi dərman vasitələri və preparatlar ümumiyyətlə mövcud deyil və ya idxalçı özəl şirkət həmin vasitəni tapıb gətirsə belə, vətəndaşın büdcəsinə uyğun olmur. Bu halda məhsulun tərkibi araşdırılır və daha münasib qiymətə əvəzləyicisi başqa ölkədən idxal olunur. Bunun nəticəsində qiymət endirilir.

Vətəndaşlara tövsiyə olunur ki, mətbuatda yayılan dezinformasiyalara inanmasınlar.

Dərman qiymətlərinin tənzimlənməsinə gəldikdə isə, bu məsələ Tarif Şurası, İqtisadiyyat Nazirliyi, Səhiyyə Nazirliyi və Sosial Müdafiə Nazirliyinin birgə həll etməli olduğu bir mövzudur. Təklif edirəm ki, digər xarici dövlətlərdə olduğu kimi, tibbi icbari sığortası olan hər bir vətəndaş müəyyən dərman vasitələrini güzəştli və ya pulsuz əldə edə bilsin. Belə olduğu halda vətəndaş da icbari sığortanın ödənilməsində maraqlı olar. Əmək qabiliyyətli əhalinin iş imkanları daha da artar.

Məsələn, evdar qadın heç vaxt işləməyibsə və icbari sığorta girişinə malik deyilsə, 55-60 yaşında sağlamlıq problemi yarandıqda dərmanlarını haradan almalıdır? O yaşda iş tapmaq çətin olur, təqaüd yaşı da çatmayıb. Buna görə də həmin şəxs məcburi əməyə cəlb olunmalıdır ki, pensiya kapitalında müəyyən yığım yaransın və bu kimi hallarda həmin kapitaldan faydalanaraq lazım olan dərman vasitələrini pulsuz və ya cüzi qiymətə əldə edə bilsin.

Dəniz Pənahova