Bir neçə gün öncə məşhur iş adamı “Şərur" MTK-nın sədri, "Şərurlu İsfəndiyar" kimi tanınan İsfəndiyar Axundovun verdiyi açıqlama sosial şəbəkələrdə hələ də müzakirə edilir. İş adamının "Mən oturmuşam başda, çoban, alimlər işləyir, pullar da gəlir” deməsi cəmiyyət tərəfindən birmənalı qarşılanmayıb.

Məsələnin aktuallığını nəzərə alan Manset.az iş adamı İsfəndiyar Axundovla əlaqə saxlayıb. O, özünü amerikalı ixtiraçı və milyarder İlon Maskla müqayisə edib:

"Mask texnikumu qutarıb, onun yanında alimlər işləyir. Bu ayıb işdi bəyəm? Onda Mask desin ki, mən stolun başında otura bilmərəm? Ticarət mərkəzlərindən birinə gedək, mən sizə min alim göstərərəm ki, oturub birinci sinif bitirməyən dükan sahiblərinin yanında satıcı işləyir. Neyləməliyəm? Mən onları işə düzəltməliyəm? Mən bu dəqiqə elə adamlara 10-15 min manat maaş verirəm. Kim onlara elə maaş verər? Mən çobanam deyə stolun başında yox, arxasında oturmalıyam? Mən müdir ola bilmərəm? Bəs işləri kim idarə edər? Mən imkansız insanların ali təhsil almasına çox kömək eləmişəm. Elə adamları elə səviyyəyə çıxartmışam ki... Bu gün elə alim var ki, mənim yanımda işləmək istəyir. Bu mənim günahımdır?".

İsfəndiyar Axundov “Proqress 2016” MTK-nın rəhbəri Emil Səməndərovun onu məhkəməyə verməsinə də münasibət bildirib:

"Doğru məlumatdır. Emil deyilən şəxs 30 milyona qədər yeyinti edib, onu tutublar. Onun hələ də məhkəməsi davam edir. Təhvil verə bilmədiyi mənzillərin tikintisini davam etdirmişəm. Emil Səməndərov də deyir ki, mənim yarımçıq qoyduğum işi niyə İsfəndiyara veriblər? Mən həbsdən çıxandan sonra əlavə pul qazanacaqdım. O məndən 5 milyon istəyir ki, həmin binadan qazanacaqdım. İşgüzar nüfuz məsələsinə gəlincə isə Emil Səməndərov 30 milyon pul atıb, hansı işgüzar nüfuzdan danışır? Nüfuzun varıydı sənin? Sən türmədə olanda bu işi mənə veriblər ki, mən yarımçıq işi başa çatdırım".

Məlumat üçün qeyd edək ki, “SpaceX”, “Tesla Motors” şirkətlərinin yaradıcısı və rəhbəri İlon Mask Pretoriya Universitetində təhsil alıb, daha sonra Pensilvaniya Universitetinə keçərək iqtisadiyyat və fizika üzrə bakalavr dərəcəsi alıb.