Məşhur “Discovery” sənədli filmlərinin rejissoru təyyarə qəzasında öldü - FOTO
18-06-2023, 11:54
Sənədli filmləri ilə tanınan məşhur alyaskalı pilot Cim Tvetonun “Cesna” tipli təyyarəsi Alyaskanın qərbində qəzaya uğrayıb.
Nəticədə məşhur sənədli film rejissoru və əfsanəvi pilot Cim Tveto dünyasını dəyişib.
Bu barədə onun qızı Ariel “Instagram” hesabında paylaşım edib.
ABŞ Milli Nəqliyyat Təhlükəsizliyi Şurasından verilən açıqlamaya görə, Alyaskanın qərbindəki Şaktoolik və Unalakleet bölgələrində təyyarə qəzası baş verib. Hadisə yerinə gələn qruplar Cim Tveto ilə yanaşı daha bir nəfərin cəsədini aşkar ediblər.
Bildirilib ki, təcrübəli pilot olan Tveto əsasən “Cesna 180” və “Cesna 207” təyyarələri ilə uçuşlar həyata keçirib. Kanzasda dünyaya gələn Cim Tveto 12 il əvvəl son mövsümünü bitirən “Discovery”nin “Flying Wild Alaska” sənədli filmində yer alıb. Minnesotada böyüyən və Alyaska Universitetində təhsilini başa vuran pilot, həmçinin uçuş şirkətinin qurucusu olub. Onun şirkəti tezliklə Alyaskanın əsas regional hava daşıyıcılarından birinə çevrilib.
Qeyd edilib ki, Tvetonun qardaşı Ron da 2008-ci ildə Arkanzasda təyyarə qəzasında həyatını itirib. Mənbə: Haber Global