"Amma 1 aylıq yükləndi, qalan pullar hardadır, kim bilir..."

Qaynar.info-nun məlumatına görə 2 aydan çoxdur ki, Bakı Dövlət Universiteti tələbələrinin yüklənməyən təqaüdləri qismən də olsa ödənilib. Lakin tələbələr Beynəlxalq Bankın 2 aylıq pulları yüklədiyi halda, universitetin onlar üçün nəzərdə tutulan təqaüdlərin yarısını qəsdən ödəmədiklərini iddia edirlər.

BDU Jurnalistika fakültəsinin 4-cü kurs tələbəsi, gənc jurnalist Kamil Əmirli yazır:

"Nəhayət 2 aydan sonra BDU tələbələrinin səbrsizliklə gözlədiyi təqaüdlər yükləndi kartlara. Amma 1 ayın təqaüdü (fevral ayının təqaüdləri) yüklənib. Maliyyə Nazirliyi deyir ki, universitetlərdəki müəllim və tələbələr üçün maliyyə ayrılıb və maaşlar, təqaüdlər vaxtlı-vaxtında göndərilir. Beynəlxalq Banka müraciət edən tələbələrə deyilir ki, biz 2 ayın (fevral və mart) təqaüdlərini universitet balansına köçürmüşük. Universitet özü ödənişli oxuyanların kartlarını və siyahısını dəqiq hazırlamır və buna görə də, ödənişli tələbələrin təqaüdü gecikir. Bəs, ödənişsiz oxuyanlar? Bizlərin ki kartlarımız fevralın əvvəlində verildi və təqaüdlər gəlməlidir. Gəldi, amma 1 aylıq. Niyə? Hansı səbəbə mart ayının təqaüdü verilmir? Tələbələrin ötən həftə yazdıqları narazılıq statuslarından sonra universitetin maliyyə şöbəsi bildirmişdi ki, ödənişsiz tələbələrin 2 aylıq təqaüdləri ən gec gələn həftənin ortalarına qədər (yəni, bu günə kimi) kartlara yüklənəcəkdi. Amma 1 aylıq yükləndi, qalan pullar hardadır, kim bilir.

İnanın, o 55 manata da gözünü dikən, ayın sonunu həvəslə gözləyən tələbələrimiz var. Mən işləyirəm, aylıq xərclərimi ödəyirəm, amma çoxları bunu edə bilmir axı. Biraz insanlığınız, vicdanınız olsun!", - deyə Əmirli qeyd edib.

Xatırladaq ki, bir müddət öncə universitetin rektorunun maliyyə məsələləri üzrə müşaviri Məzahir Sultanov bildirib ki, təqaüdlərin gecikdirilməsi onlardan asılı bir məsələ deyil. O, səbəb kimi ödənişli oxuyan tələbələrin təqaüd kartlarnın hazırlandığını göstərib.

Qarşı tərəfin mövqeyini yayımlamağa hazırıq.
teref.az