Abşeron Rayon İcra Hakimiyyəti Başçısının Xırdalan Şəhər üzrə Nümayəndəliyi Xırdalan şəhərində yolların təmiri işlərinin satın alınması ilə bağlı tenderə yekun vurub.
Qaynarinfo xəbər verir ki, tenderin qalibi “Xezer-Construction” MMC seçilib. Nümayəndəlik Xırdalanda yolların təmirinə 1 261 045,32 AZN xərcləyəcək.
İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, “Xezer-Construction” MMC 26 fevral 2018-ci ildə qeydiyyata alınıb. Nizamnamə kapitalı 200 AZN olan şirkətin hüquqi ünvanı Bakı şəhəri Nizami rayonu, Keşlə qəsəbəsi, Qasım bəy Zakir küçəsi, ev 1130-da yerləşir. MMC-nin qanuni təmsilçisi Binnətov Rəmzi Rüfət oğludur.
20 aprel 2023-cü il tarixdə reystr məlumatlarına dəyişiklik edilib. Bu dəyişikliklə MMC-nin hüquqi ünvanı və qanuni təmsilçisi dəyişib. Bundan əvvəl “Xezer-Construction” MMC-nin hüquqi ünvanı Bakı şəhəri Nizami rayonu, Mətləb Ağayev küçəsi, ev 36, mənzil 1-də yerləşib. Şirkətin qanuni təmsilçisi isə Abışov İslam Məhəmməd oğlu olub.
“Xezer-Construction” MMC barəsində açıq mənbələrdə heç bir məlumata rast gəlinmir.
Dövlət satınalmalarının elektron portalında yerləşdirilən müsabiqə elanlarına diqqət etdikdə şirkətin tenderlərdə fəal iştirakını görürük. “Xezer-Construction” MMC-nin qalib gəldiyi tenderlər adətən yerli icra hakimiyyətlərinin keçirdiyi satınalma müsabiqələri olur. Məsələn, şirkət bundan əvvəl Lənkəran Şəhər İcra Hakimiyyətinin 729 425,78 AZN-lik tenderinin qalibi olub.
Bu arada qeyd edək ki, Abşeron Rayon İcra Hakimiyyəti Başçısının Xırdalan Şəhər üzrə Nümayəndəliyi ötən il Xırdalanda yollarına təmirinə 1 199 683,58 AZN xərcləyib. Bununla bağlı keçirilən tenderin qalibi “Uğrulu-İnşaat” MMC olub.
Abşeron Rayon İcra Hakimiyyətinin başçısı Abdin Fərzəliyevdir. Onun Xırdalan şəhər üzrə nümayəndəsi isə Malik Məmmədovdur.