Sadiq oxucularımız xatırlayarlar, 23 avqust 2023-cü il tarixdə “Deryaz.az” saytında Gədəbəy Rayon Mərkəzi Xəstəxanasının baş həkimi Etibar Hüseynovun zorakı hərəkətlərinə məruz qalmış xəstəxananın tibb bacısı Hacıyeva Vüsalə Əfraim qızının şikayətini dərc etmişdik. Məlumatda bildirilirdi ki, baş həkim əvvəlcədən planlaşdırdığı fikri həyata keçirmək üçün 06.07.2023-cü il tarixdə Hacıyeva Vüsaləyə zor tətbiq edərək müqavimətini qırmağa çalışmış, qollarından tutaraq qeyri — etik hərəkətlər etmiş, onu zorakılığa məruz qoymuşdur. Lakin Vüsalə Hacıyeva təcavüzkarın əlindən çıxmağa müvəffəq olub dəhlizə qaçmış və Daxili İşlər Nazirliyinin “102” qaynar xəttinə zəng vuraraq yardım istəmiş, şikayət etmişdir.

İndi isə həmin məsələ ilə əlaqədar daxil olmuş əlavə məlumatlar əsasında mövzuya bəzi dəqiqləşdirmələr etməyi lazım bildik. Məsələ burasındadır ki, Etibar Hüseynov Vüsalə Hacıyevaya çoxdan göz qoyurmuş və niyyətini həyata keçirmək üçün baş tibb bacısı Nərminənin xidmətindən yararlanmaq istəyirmiş. Nərminə dəfələrlə Vüsaləni “yola gətirməyə” uğursuzcasına cəhd etmiş, ona təklif etmişdir ki, Etibarın maşınına minsin.

Vüsalə Hacıyeva bildirir ki, baş həkim əvvəlcə şantaj metodundan istifadə etməyə çalışmış, onu yanına çağıraraq demişdir ki, onun və eyni xəstəxanada çalışan bacısı Səbinənin barəsində xoşagəlməz söz-söhbətlər gəzir və özünün bir rəhbər kimi bu işlərə göz yumması üçün gərək Vüsalə onunla yaxınlıq etsin. Vüsalə Hacıyeva bu söz-söhbətləri kimin yaydığını soruşduqda, baş həkim konkret cavab verməmiş, ancaq Vüsalə sonradan həmin dedi-qodu yayan şəxsin Etibarın planı üzrə hərəkət edən Nərminə olduğunu öyrənmişdir. Baş həkim dəfələrlə, ciddi bir səbəb oldu-olmadı Vüsaləni otağına çağırmış, hətta tibb bacısının xəstəyə xidmət etdiyi dəqiqələrdə belə işini yarımçıq qoyub onun yanına gəlməsinə israr etmişdir. Vüsalənin “ipə-sapa yatmadığından” səbri tükənən Etibar Hüseynov nəhayət tibb bacısının kabinetinə yaxın yerləşən otağına çağıraraq çirkin niyyətini başa çatdırmağa çalışmışdır. Lakin qadın ciddi müqavimət göstərmiş, onunla sözün hərfi mənasında əlbəyaxa olmuşdur. Nəticədə Etibarın niyyəti baş tutmamış, qadının bədəninin bəzi nahiyələri xəsarət alaraq göyərmişdir. Haraya gələn bacısı Səbinə Vüsalənin bu halını görmüşdür.

Vüsalə Hacıyevanın üzərində müşahidə olunan zorakılıq əlamətləri haqqında Gədəbəy rayon Tibbi-Ekspertiza Mərkəzindən rəy almaq istəyi alınmamışdır. Onun fikrincə, yerli məhkəmə tibb ekspertləri Etibar Hüseynovla bağlı skandal yaradacaq rəyi vermək istəməmişlər. O, məcbur olub Şəmkir Tibbi-Ekspertiza Mərkəzindən rəy ala bilmişdir. Di gəl, Gədəbəy Rayon Polis Şöbəsinə təqdim etdiyi həmin rəy sonradan “itib-batmışdır”. Sənədləri heç prokurorluqda da “üzə çıxartmamışlır”. Polis təhqiqatçısı Fərid gah həmin sənədi öz evinə apardığını, işə gətirməyi yaddan çıxardığını, gah da prokurorluqda olduğunu demiş, axır ki, Vüsaləni prosesi əks etdirən sənədlərlə tanış etməkdən yayınmışdırlar.

Ötən məqalədə qeyd etdiyimiz kimi, baş həkim Etibar Hüseynovun bu qeyri-etik əməli haqqında nə Səhiyyə Nazirliyində, nə də ki DİN-də heç bir tədbir görülmür. İcbari Sığorta üzrə Dövlət Agentliyi isə vətəndaş Hacıyevanın şikayətini “aidiyyəti üzrə baxılması üçün” TƏBİB-ə göndərməklə kifayətlənmişdir. TƏBİB isə öz növbəsində təxmin etdiyimiz kimi, müraciətnaməni araşdırılması üçün Gədəbəy Rayon Xəstəxanası Publik Hüquqi Şəxsin direktoruna göndərmişdir.


Vüsalə Hacıyevə redaksiyamıza bildirdi ki, polis idarəsində İXM-nin 157-ci maddəsi ilə açılan cinayət işini prokurorluq bu işə xitam vermək istəyir. İXM-nin 157-ci maddəsi isə döymə inzibati xətasını nəzərdə tutur. Belə anlayış verilir – döymə və sair zorakı hərəkətlərlə qəsdən fiziki ağrı yetirmə. Döymə inzibati xətası qəsdən törədilən əməldir. İXM-nin 157-ci maddəsinin sanksiyasında döymə inzibati xətasının törədilməsinə görə 600 manatadək cərimə və ya işin hallarına görə, xətanı törədənin şəxsiyyəti nəzərə alınmaqla 2 ayadək müddətə inzibati həbs tətbiq olunur. İXM-nin 157-ci maddəsində həmçinin qeyd hissə nəzərdə tutulmuşdur ki, bu maddədə nəzərdə tutulmuş əməl sağlamlığa ağır, az ağır və ya yüngül zərər vurmaqla törədildikdə, Azərbaycan Respublikası Cinayət Məcəlləsinin müvafiq (CM-nin 126, 127 və 128-ci maddələri) maddələrinə əsasən cinayət məsuliyyətinə səbəb olur.

Vüsalə Hacıyeva şübhələnir ki, Şəmkir Tibb-Ekspertiza Mərkəzinin verdiyi ilkin rəy məhz sağlamlığa az ağır, ya ağır zərər vurmaqla törədilmiş əmələ uyğun gələ bilər və sonradan ekspertlərə təzyiq göstərib dəyişdirilməsinə nail ola bilərlər. Bununla da Etibar Hüseynovun əməlinin CM ilə deyil, İXM ilə tövsif edilməsinə nail ola bilərlər. Şikayətçinin sözlərinə görə, hətta onun dediklərinin əksini iddia edən “şahidlər” də tapmış, işə yerli-dibli xitam verməyə çalışırlar.

Vüsalə Hacıyeva həmçinin bildirir ki, Etibar Hüseynov indi onun işləməsinə mane olur, “otağını tərk et” deyir, müxtəlif üsullarla çalışır ki, bezib özü işdən çıxsın. Xəstələrə qulluq göstərməsinə şərait yaradılmır, işinin narazılıq doğurması üçün badalaqlar qurur və s.

Məlumata görə, Gədəbəy rayon prokuroru Əli Babayevin anası doktor Etibar Hüseynovun həyat yoldaşı ilə həmkardırlar, Yasamal rayonunun məktəblərinin birində müəllim işləyirlər. Royonda “baz Etibar” ləğəbiylə tanınan baş həkim , Etibar Hüseynova Prokuror Əli Babayev bu gün öz haqsız addımlarıyla, qanunazidd qərarlarıyla Vətən uğrunda savaşlarda mənfur düşmən erməni qabağında sınmayan gədəbəyliləri ədalətsizlik qarşısında alçaq itaətə boyun əydirmək istəyir, rayonda bir növ qeyrətsizlik sindromu yaratmağa çalışır. Haqqı-hüququ tapdalanan vətəndaşların deyil, günahkarı cəzalandırmaqdansa, doğrunu deyənin “bağrını yarmaq”, mərdi qova-qova namərd etmək yolunu tutub. Bu yarıtmaz siyasətdən ən çox zərərçəkənlər isə təkcə ismətini, namusunu qorumaq istəyən Vüsalə Hacıyeva kimi qadınlar deyil, iş adamları, sahibkarlar da ziyan çəkir, şərə-böhtana məruz qalırlar.

Əlbəttə, Əli Babayevin müstəbid siyasətindən tabeliyindəki səhiyyə işçiləri bu qədər zaval görürlərsə, təbii ki, tibbi xidmət üçün xəstəxanaya üz tutan vətəndaşlar daha çox ziyan çəkirlər. Müraciətlərə həssas yanaşılmır, insanlar süründürməçiliklə, laqeydliklə, kobud rəftarla üzləşirlər. Üç il əvvəl baş vermiş Vətən müharibəsi Qələbə ilə nəticələnsə də, onun vurduğu yaralar hələ sağalmayıb. Söhbət təkcə övladları şəhid, qazi olmuş Gədəbəy sakinlərindən getmir. Bununla belə, Gədəbəy vətəndaşları Rayon Mərkəzi Xəstəxanasında Etibar Hüseynov kimi saxtakarların ucbatından icbari tibbi sığortanın verdiyi imkanlardan gözü dolusu yararlanmaqda süni maneələrlə üzləşirlər. Yeri gəlmişkən, «Baz Etibar» haqqında “saxtakar” sözünü heç də haqsız işlətmədik. Etibar Hüseyinov iş başına keçəndən artıq ikinci dəfədir ki, işi polisə düşüb. Tibb bacısına sataşmamışdan daha əvvəl həbsdə olan şəxsə sağlamlıq haqqında arayış verdiyinə görə “ilişib”. Polis həbsdəki qardaşı üçün sağlamlıq arayışı alan şəxsi sorğulayıb, hətta iş prokurorluğa ötürülüb. Amma Etibar Hüseyinov necə olubsa, onda da “çulunu sudan quru çıxarmağa” nail olub.

Deryaz.az