Qarətləri izləyən beynəlxalq alimlər və rəqəmsal ekspertlər qrupunun məlumatına görə, bir qrup mütəxəssis Ukraynadan Rusiyaya qiymətli tarixi eksponatların qaçaqmalçılığı ilə məşğuldur.
Teref.az xəbər verir ki, bu barədə “The Guardian” nəşrinə arxeoloqlar, tarixçilər və rəqəmsal görüntüləmə mütəxəssisləri ilə işləyən antropoloq alim Brayan Daniels məlumat verib.
“İndi çox güclü sübutlar var ki, müəyyən rəsmlər və bəzək əşyaları Rusiyaya aparılıb. Bu, onların qəsdən atdığı bir addımdır” – o, bildirib.

ABŞ-ın Virciniya ştatındakı laboratoriyadan Daniels və onun həmkarları Rusiyanın Ukraynaya hücumunun əvvəlindən mədəni sərvətlərin talan edilməsi və dağıdılmasını izləyir və cinayətlərdə nümunələr tapırlar. Oğurluq izi əsasən qiymətli skif qızılı üzərində cəmlənir. Bunlar çox vaxt heyvanları təsvir edən qədim filiqra məhsullarıdır.

“Bu əşyalar vizual olaraq heyrətamizdir və indi qarətlə bağlı o qədər çox məlumat var ki, bunun bir strategiya olduğu açıq-aydın görünür. Ukraynalılar da təbii ki, bizim oğurlanmış əşyaların siyahısını tərtib etməyimizdə çox maraqlıdırlar”, – Daniels qeyd edib.

Alim ayırd edə bilmir ki, pul dəyəri ruslar üçün ən vacib amil olub, yoxsa əşyalar mədəni əhəmiyyətinə görə seçilib: “Bəlkə də bütün bunlar Ukraynanın nüfuzunu sarsıtmanın bir hissəsidir”. Onun sözlərinə görə, oğurluqlar adətən muzeyin kuratorları və gözətçilərin təhdidli dindirilməsindən sonra baş verir.

Rusiyanın Ukraynanın işğal olunmuş şəhərlərində gizli əşyaları tapmaq və oğurlamaq cəhdləri getdikcə daha qətiyyətli xarakter alır: “Biz muzey işçiləri və təhlükəsizlik əməkdaşları üçün getdikcə daha çox narahat oluruq, xüsusən də onlar özlərini Rusiya xəttinin arxasında gördükləri zaman”.

Publika.az