Regionda müharibə EHTİMALI: - “Rusiya və ABŞ Ermənistanda toqquşur”
19-07-2024, 00:06
“Bölgə yeni müharibəyə davam gətirə bilməz”.
Bu sözləri Yenicag.az-a açıqlamasında Ermənistan mediasında qış aylarında Azərbaycanla Ermənistan arasında müharibənin olma ehtimalının irəli sürülməsini şərh edən politoloq Qabil Hüseynli deyib.
Qabil Hüseynli bildirib ki, müharibə ehtimalı yoxdur.
“Müharibə Ermənistan və havadarları Azərbaycanı şərtlər irəli sürmədən sülhə vadar etmək üçün uydurduqları bir bəhanədir. Bölgə yeni müharibəyə davam gətirə bilməz. Ermənistan özü də, müharibə edəcək gücdə deyil. Nə hərbi, nə də iqtisadi baxımdan müharibə edəcək potensialı yoxdur. Yeni müharibə regiona fəlakət gətirə bilər”, – deyə o əlavə edib.
Onun sözlərinə görə, hazırda Ermənistan ordusu ilə ABŞ ordusu arasında hərbi təlimlər keçirilir.
“Faktiki olaraq, Rusiya və ABŞ Ermənistanda toqquşur. Hesab edirəm ki, bu regionda gərginliyi artıracaq. Ancaq yeni müharibənin olacağını istəməzdim. Region çox təhlükəli bir vəziyyətlə üz-üzə qala bilər”, – deyə o fikirlərini yekunlaşıdırıb.