Türkmənistanda növbədənkənar prezident seçkilərində səsvermə üçün seçki məntəqələri bu gün yerli vaxtla səhər saat 7-dən açılıb.

AZƏRTAC xəbər verir ki, ölkə üzrə ümumilikdə 2577 seçki məntəqəsi yaradılıb. Vətəndaşların təhlükəsizliyi üçün burada sanitar-profilaktik tədbirlər həyata keçirilib, 300-dən çox sahə innovativ dezinfeksiya cihazları ilə təchiz edilib.

Paytaxt vətəndaşları vilayət və rayonlarda yaşadıqları ərazi üzrə səs verirlər. Artıq 2726 milli müşahidəçi, eləcə də MDB-dən olan müşahidəçilər missiyası seçkiləri izləməyə başlayıb.

Bütün seçki məntəqələrində populyar müğənnilərin, yaradıcı kollektivlərin çıxışları təşkil olunur.

Səsvermə saat 19:00-dək keçiriləcək.

Xatırladaq ki, Mərkəzi Seçki Komissiyasında Türkmənistan prezidenti postuna ümumilikdə doqquz namizəd qeydə alınıb. Üç namizəd siyasi partiyalar, altı namizəd isə vətəndaşların təşəbbüs qrupları tərəfindən irəli sürülüb.