Əlilliyi olduğu üçün evinə işıq, qaz çəkmirlər... - GİLEY

23-04-2019, 11:47           
Əlilliyi olduğu üçün evinə işıq, qaz çəkmirlər... - GİLEY
Almas Əmirova qardaşı oğlu üçün əlaqədar qurumlara müraciət ünvanlayıb

“Qardaşım Oruc bir neçə il əvvəl xəstəlikdən vəfat edib. Oğlu, 3-cü qrup əliliyi olan Sərvər Əmirov tək qalıb. Onun yaşayış şəraiti və dolanışığı ağırdır. Evinə qaz və işıq çəkilmir. Nəticədə, qaranlıq, soyuq bir daxmada yaşamağa məcburdur”.

Şəkinin Baş Göynük kəndinin sakini Almas Əmirova belə deyir. O, 29 yaşlı qardaşı oğluna görə çox narahat olduğunu söyləyir:

“Onun yaşadığı daxmaya işıq və qaz çəkilməsi üçün dəfələrlə yerli orqanlara ərizə ilə müraciət etmişəm. Heç bir xeyri olmayıb. Qardaşım oğlu Sərvər fiziki cəhətdən güclü olsa da, son 3 ildir ki, qışı da, payızı da elektriki və qazı olmayan birotaqlı daxmada keçirib. Yazıq uşaq mağara şəraitində yaşamağa, daha doğrusu, mövcud olmağa məhkumdur”.

Almas Əmirova deyir ki, kənd əhalisi Sərvərin qeydinə qalır, ona əllərindən gələn köməyi göstərirlər. Ancaq bəzi şeylər var ki, onlar əhalinin əlindən gəlmir, gərək dövlət də kömək etsin:

“Aidiyyatı təşkilatlar onun evinə qaz və elektrik sayğacı qoydurub adam kimi yaşamasına imkan vermirlər. Sərvər pulu olmadığına görə Robinzon Kruzo kimi tək-tənha yaşayır. Çox sakit və avam olduğuna görə kənd sakinləridən bəziləri onu aldadaraq, gündəlik 2-3 manat pul verib öz təsərrüfatlarında qul kimi işlədirlər. Çarəsiz tifil də özünə çörək almaq üçün bütün əzablara qatlanır”.

Bibisi deyir ki, Sərvərin əlilliyə görə aldığı çox az təqaüddən başqa gəliri yoxdur. Hətta ünvanlı sosial yardıma da müraciət edib, verməyiblər:

“Axı o da insandır. Aldığı qəpik-quruş təqaüdünü dərmanlara veririk ki, xəstəliyi artmasın. Onun gündəlik quru çörəkdən başqa yeməyə heç nəyi olmur. Kim inanmırsa, kəndimizə gəlib, Sərvərin dəhşətli yaşam tərzinin şahidi ola bilər”.

Almas Əmirova qardaşı oğlu Sərvər Əmirovun işıqsız, qazsız, ağır vəziyyətdə yaşaması ilə bağlı Prezident İlham Əliyevə, Birinci vitse-prezident Mehriban Əliyevaya, energetika naziri Pərviz Şahbazova, iqtisadiyyat naziri Şahin Mustafayevə, Azərbaycan Respublikasının Audit-Azərbaycan təşkilatına, SOCAR prezidenti Rövnəq Abdullayevə, “Azəriqaz” İB-nin sədri Əkbər Hacıyevə, Azərenerji ASC-nin sədri Baba Rzayevə, “Azərişıq” ASC -nin sədrinə, Ombudsman Aparatının sədri E.Süleymanovaya, Ailə, Qadın və Uşaq problemləri üzrə Dövlət Komitəsinə məktubla müraciət edib. Xahiş edib ki, tənha və əlil qardaşı oğlu Sərvərə bir vətəndaş olaraq işıq və qaz sayğaclarının qoyulması üçün aidiyyatı üzrə tapşırıqlar versinlər.












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.