Paytaxt ərazisində təbiət qoynunda istirahət etmək üçün insanların üz tutduğu yerlərdən biri də, Mərdəkanda yerləşən yerləşən Botanika bağıdır.

Son zamanlar bu bağ şəhər sakinlərinin mədəni istirahət guşəsinə çevrilib. Xüsusilə gənc ailələr, tələbələr, övladlarını gəzdirən valideynlər, yaşlılar istirahət etmək üçün məhz bu məkanı seçirlər. Biz də Botanika bağı ilə tanış olmaq və gördüklərimizi qələmə almaq məqsədilə sözügedən ünvana üz tutduq.

Milyonçu Murtuza Muxtarov tərəfindən şəxsi bağ kimi salınan, sonralar dahi rus şairi Yeseninin də qonaq qaldığı Mərdəkan Dendrarisində hal-hazırda 2800 növ bitki var. Milli sərvət hesab olunan dendrariyə dünyanın müxtəlif ölkə və qitələrindən bitkilər gətirilib. 12 ha ərazisi olan botanika bağı 2005-ci ildən Dünya Botanika bağlarının üzvü də seçilib. Qeyd edək ki, bağda “Qorxma mən səninləyəm”, “Başsız atlı”, “Arşın mal alan”, “Dərviş Parisi partladır” kimi filmlərin çəkildiyi tarixi bina da var.Son zamanlar burada kiçik təmir işləri aparılsa da, dendrarinin artıq neçə illərdir ki, əsaslı təmirə ehtiyacı var.

Biz də digər insanlar istirahətimizi Azərbaycan Milli Elmlər Akademiyasının Dendrologiya İnstitunun yerləşdiyi ərazidə olan botanika bağında keçirmək istədik. Amma gördüyümüz ürəkaçan olmayan mənzərələr, bizi istirahətdən zövq almağa təəssüf ki, imkan vermədi. Aldığımız naz-nemətdən yemək istəyərkən, oturduğumuz masadan adambaşına 1 azn pul istənildi. Bundan əlavə çay içməyə də məcbur edilərkən, yaxşı ki, bu "təhlükədən" sovuşduq.

Bundan əlavə böyük xeyriyyəçi və neft milyonçusu olan Murtuza Muxtarovun şəxsi bağında hovuzların çirklənməsi və sanki bataqlığı xatırlatması, eyni zamanda yerə atılan zibillər, Azərbaycan xəritəsinin maketinin paslanmış formada qalması və s. təəssüf hissi doğurdu. "Təbiət-İlahi tərəfindən yaranmış-Ona hörmətsizlik, Vətənə, Torpağa hörmətsizlikdir" sözləri yazılan məşhur bağda natəmizliyi görmək həqiqətəndə Vətənə, Torpağa hörmətsizlikdir.

Demək, göstərmək bizdən, tədbir görmək də aidiyyatı qurumların işidir. Buyurun cənablar. Biz də Mərdəkan Dendrarisinin öz əvvəlki gözəlliyini qaytaracağına və bura gələn insanların bütün fəsillərin, xüsusən də Yeseninin təsvir etdiyi Mərdəkan payızının gözəlliyini doya-doya yaşayacağımıza ümid edirik.