Ukraynada Rusiya ordusuna məxsus 40-a yaxın döyüş təyyarəsini vurduğu iddia edilən və bu yaxınlarda dünyasını dəyişən “Kiyev kabusu” ləqəbli ukraynalı pilotun real olmadığı açıqlanıb.

Sözügedən pilotun 29 yaşlı mayor Stepan Tarabalka olduğu bildirilirdi. Rəsmilər Tarabalkanın medalla təltif edildiyini təsdiqləsə də, Ukrayna Hərbi Hava Qüvvələri “Kiyev Kabusu” obrazı ukraynalılar tərəfindən yaradılmış super qəhrəman əfsanəsidir” xəbərdarlığı edərək, Ukrayna xalqını dezinformasiyaya qarşı ayıq olmağa və məlumatı yayılmazdan əvvəl mənbələri yoxlamağa çağırıb.

Ukraynalı hərb tarixçisi Mixail Jiroxov “Kiyev Kabusu” hekayəsini “mənəvi əhval-ruhiyyəni yüksəltmək üçün aparılan təbliğat” kimi qiymətləndirərək, müharibənin əvvəlində Rusiya ordusunun Ukraynanın hava məkanını nəzarətə götürdüyünü, ona görə də ukraynalı bir pilotun sadəcə iki və ya üç təyyarəni vura biləcəyini deyib.

"Bu təbliğatın olması çox vacibdir, çünki silahlı qüvvələrimiz daha kiçikdir və çoxları onlarla (ruslarla) bərabər ola bilməyəcəyimizi düşünür. Müharibə zamanı bizə bu lazımdır", - Jiroxov bildirib.

Ukrayna Baş Qərargahı iki gün əvvəl bildirib ki, Rusiya indiyədək müharibədə 190 təyyarə və 155 helikopter itirib. Lakin müstəqil hərbi analitiklər Rusiyanın 26 təyyarə və 39 helikopter, həmçinin 48 pilotsuz uçuş aparatı (PUA) itirdiyini düşünür.
Mənbə: Bakixeber.com