Müasir qadınlar bahalı salon prosedurlarına pul xərcləmədən dərilərinə qulluq etmək imkanına malikdirlər.

Gazeta.ru-nun məlumatına görə, rusiyalı kimyaçı-kosmetoloq Natalya Tkaçenko bahalı salon kosmetikası olmadan dəriyə qulluğun bir neçə üsulu barədə danışıb.

O bildirib ki, dəriyə qulluğa maskalardan başlamaq olar.

"Əvvəllər belə bir fikir var idi ki, maskanı həftədə bir dəfə etmək olar, lakin müəyyən maskaları tərkibindən və təyinatından asılı olaraq hər gün istifadə etmək olar. Onların yalnız qısamüddətli effekt verdiyini söyləmək olar, lakin hər səhər, səhər qəhvəsi içərkən onları etsəniz, effekt qabarıq olacaq. Üzümüzə maska qoyanda artıq özümüzə gözəl, təravətli və hamar dəri təmin edirik. Buna görə də onları hər gün istifadə etmək olar, lakin hansı effekti əldə etmək istədiyimizdən asılı olaraq növbələşdirmək lazımdır", - deyə o izah edib.

Mütəxəssisin sözlərinə görə, kremli və parçalı olmaqla bir neçə maska növü var.

"Krem maskanın funksiyaları tərkibindəki komponentlərdən asılı olaraq müxtəlif ola bilər. Onun üstünlükləri ondan ibarətdir ki, o, piqmentasiya ilə mübarizə apara, qidalandıra, nəmləndirə və dərinin rəngini bərabərləşdirə bilər. Krem maska daimi istifadə zamanı tədricən baş verən daha uzunmüddətli effekt verir. Amma krem maskanı götürüb daha qalın təbəqə ilə qoysaq, o zaman effekt daha tez başlayacaq. Maska daha zəngin tekstur əldə edərək əla effekt verəcək".

Ekspert parça maskanın parça əsasının xüsusi losyon və ya serumla zənginləşdirilməsi hesabına daha intensiv təsirə malik olduğunu qeyd edib.

"İstənilən maskanın effektivliyi məhz onun tərkibi ilə müəyyən edilir. Parça və ya kremvari olmasından asılı olmayaraq, əsas olan tərkibindəki aktiv komponentlərdir. Əgər söhbət nəmləndirici maskadan gedirsə, onun tərkibinə hialuron turşusu, aminturşular, xitozan cövhəri, təbii nəmləndirici faktor, kollagen və elastin daxildir. Onlar həm kremli, həm də parça maskada ola bilər.

Bütün dəri tipləri üçün uyğun olan universal maska nəmləndirici maskadır. Təmizləyici maskanı qarışıq, yağlı və qara nöqtəli dəri üçün tövsiyə etmək olar. Yaşlanmaya qarşı effektli və liftinq maskalar var ki, onlar dərinizin daha cavan və dartılmış görünməsinə kömək edəcək", - deyə o qeyd edib.

Natalya Tkaçenko, həmçinin yüngül səthi pilinqlərdən istifadə barədə məlumat verib.

"Onların salon pilinqlərindən üstünlüyü ondadır ki, adaptasiya dövrü yoxdur, salon pilinqlərindən sonra tez-tez olduğu kimi dərinin soyulmasını gözləmək lazım deyil. Ev prosedurlarından dərhal sonra dəri hamar, nəmlənmiş, qulluq edilmiş görünəcək və işığı yaxşı əks etdirəcək. Nəticədə, üzünüz dincəlmiş və təravətli görünəcək. Onları ev şəraitində həftədə bir dəfə istifadə etmək olar".

Kosmetoloq ev qulluğu üçün üz masajlarını da tövsiyə edib.

"Yaxşı effekt əldə etmək üçün aktiv tərkibli keyfiyyətli kosmetik vasitə seçmək lazımdır. O zaman o, dəriyə qulluq edəcək və onu qidalandıracaq. Arzuolunandır ki, kosmetik vasitənin tərkibində skvalan, efir yağları və vitaminlər olsun, o zaman kosmetik məhsul sizin üçün təbii və effektiv olacaq", - deyə ekspert bildirib.

O, yekunda bildirib ki, tələblərə və ehtiyaclara cavab verəcək masajı seçmək çox vacibdir.