NATO-nun keçmiş baş katibi Corc Robertson noyabrın 3-də yayımlanan podkastda Rusiya prezidenti Vladimir Putin haqqında təəccüblü iddia ilə çıxış edib.

Modern.az “Guardian” nəşrinə istinadən xəbər verir ki, 1999-2004-cü illərdə NATO-ya rəhbərlik edən Robertson Putinin hakimiyyətə gəlişindən sonra Rusiyanın alyansa qoşulmasını istədiyini irəli sürüb.

İddialara görə, Putin Rusiyanın “standart müraciət prosesindən keçməsinə razı olmayıb.

“Rusiya o dövrdə təhlükəsiz, sabit və firavan Qərbin bir hissəsi olmaq istəyirdi”, - deyə o qeyd edib.

Böyük Britaniyanın aparıcı qəzetlərindən biri olan “The Guardian” yazıb ki, bu iddialar Putinin 21 ildən çox əvvəl BBC-yə verdiyi müsahibədəki açıqlamaları ilə üst-üstə düşür. Putin müsahibəsində deyib ki, Rusiyanın bərabərhüquqlu tərəfdaş kimi fikirləri nəzərə alınarsa, o, NATO-ya üzv olmaqdan imtina etməyəcək.

“Rusiya Avropa mədəniyyətinin bir hissəsidir. Mən öz ölkəmi Avropadan və “sivil dünya” dediyimiz yerdən ayrı düşünə bilmirəm”, - deyə Putin bildirib.