İranın Gülüstan (Türkmənsəhra) əyalətinin Qalikeş şəhərində sünni məzhəbli axund, mövləvi Məhəmməd Hüseyn Qorqicin işdən kənarlaşdırılması yerli sünni əhalisinin qəzəbinə səbəb olub.

Bizim.Media "Azad İran" Telegram kanalına istinadən xəbər verir ki, sosial şəbəkələrdə yayılan video və xəbərlərə əsasən, dekabrın 23-ü axşam saatlarında sünni axundun yüzlərlə tərəfdarı küçələrə axışaraq, “Allahu əkbər” və digər şüarlar səsləndirərək mövləvi Hüseyn Qorqicin şəhərdə cümə imamı vəzifəsindən uzaqlaşdırılmasına etiraz ediblər.

Polis və əmniyət qüvvələrinin onlarla etirazçını həbs etdiyi deyilir. Habelə, təhlükəsizlik qüvvələri sünni axundun özünü də həbs edib dindirdikdən sonra müvəqqəti sərbəst buraxıblar.

Yerli sünni mənbələrinin sözlərinə görə, Məhəmməd Hüseyn Qorqicə təzyiq göstərilib. Ona deyiblər ki, dekabrın 24-də Qalikeşdə keçiriləcək cümə namazına imamlıq etməkdən imtina etməli, tərəfdarlarını sakit qalmağa çağırmalıdır.