Harris gündə 25 milyon dollar toplaya bilib və təxminən bir ay ərzində maliyyə 500 milyon dollara çatıb

ABŞ-ın vitse-prezidenti, Demokratlar Partiyasının prezidentliyə namizədi Kamala Harrisin seçki kampaniyası və ona bağlı siyasi dəstək komitələri 1 milyard dollar toplayıb. AYNA xəbər verir ki, bu barədə “Reuters”ə Harrisin seçki kampaniyasının gedişi ilə tanış olan mənbə məlumat verib.

Bildirilir ki, Harris iyulun 21-də ABŞ prezidentliyi uğrunda yarışda Prezident Co Baydeni əvəz etdikdən sonra maliyyə onun kampaniya kassasına, əlaqəli siyasi fəaliyyət komitələrinə və Demokratlar Partiyasına görünməmiş sürətlə daxil olub. Harris gündə 25 milyon dollar toplaya bilib və təxminən bir ay ərzində maliyyə 500 milyon dollara çatıb.

Respublikaçılar Partiyasının namizədi, keçmiş Prezident Donald Tramp və Respublikaçılar Partiyası avqust ayında 130 milyon dollar toplayıb və yayın sonunda 295 milyon dollar nağd pula sahib olub.