Avropa Komissiyası (AK) Ukraynaya daha 1 milyard avro ayırıb.

“RBK-Ukrayna” xəbər verir ki, vəsait G7-nin krediti çərçivəsində verilib və bu, dondurulmuş Rusiya aktivlərindən əldə edilən vəsait hesabına ödənilməlidir.

“Bu gün AK Ukraynaya Rusiyanın Avropa İttifaqındakı (Aİ) dondurulmuş dövlət aktivlərindən əldə edilən gəlirlər hesabına ödəniləcək əlavə 1 milyard avroluq müstəsna makromaliyyə yardımı tranşı ayırıb. Bu, Rusiyanın Ukraynaya qarşı müharibəyə başlamasından bəri Aİ-nin ən böyük donor rolunu gücləndirir”, – bəyanatda deyilir.

Ümumilikdə makromaliyyə yardımı 18,1 milyard avro təşkil edir ki, bu da Aİ-nin G7-nin rəhbərlik etdiyi ERA təşəbbüsünə verdiyi töhfəni əks etdirir. Bu təşəbbüs çərçivəsində G7 Ukraynaya təxminən 45 milyard avro maliyyə dəstəyi verəcək.

Ümumilikdə Ukrayna bu il bu kredit çərçivəsində artıq Aİ-dən 4 milyard avro alıb.

Ukraynanın Baş naziri Denis Şmıqal ERA təşəbbüsü çərçivəsində Aİ-dən 1 milyard avro aldığını təsdiqləyib. Onun sözlərinə görə, bu, artıq Rusiyanın dondurulmuş aktivlərindən əldə edilən gəlirlə təmin edilən ikinci tranşdır. Vəsaitlər dövlət büdcəsinin prioritet xərclərinə yönəldiləcək.

AK-dan qeyd edilib ki, Rusiyanın Ukraynaya qarşı genişmiqyaslı müharibəsi başlayandan bəri Aİ ümumilikdə 140 milyard avroya yaxın yardım edib.