Danimarka parlamenti ABŞ-lə imzalanmış “Müdafiə sahəsində əməkdaşlıq sazişi”ni təsdiqləyib.

Teleqraf xəbər verir ki, bu barədə Danimarka mətbuatı məlumat yayıb.

Bu razılaşma ABŞ-nin Danimarka ərazisində, o cümlədən Qrenlandiyada hərbi baza qurmasına, qoşun yerləşdirməsinə və hərbi texnika saxlamasına imkan yaradır. Sənəd ABŞ Prezidenti Donald Trampın hakimiyyətə gəlməsindən əvvəl - 2023-cü ilin dekabrında imzalanıb.

Sazişə dair səsvermə Qrenlandiyanın strateji əhəmiyyəti və ABŞ-nin orada hərbi mövcudluğunu artırmaq niyyəti fonunda ciddi ictimai və siyasi müzakirələrə səbəb olub. Xüsusilə Trampın Qrenlandiyanı "nəzarət altına almaq" niyyəti ilə bağlı açıqlamaları bu gərginliyi daha da artırmışdı.

Sazişin əsas məqsədi Danimarka və ABŞ arasında milli təhlükəsizlik sahəsində əməkdaşlığın dərinləşdirilməsi və Arktika bölgəsində NATO-nun mövqelərinin gücləndirilməsindən ibarətdir.

Müqavilə Qrenlandiyada ABŞ-nin hərbi mövcudluğunu rəsmi şəkildə genişləndirməsinə hüquqi baza yaradır.