Alman avtomobil nəhəngi "Volkswagen" tarixində ilk dəfə olaraq Çində Nankin şəhərindəki SAIC ilə ortaq müəssisəsini bağlamaq qərarı verib. 2008-ci ildən fəaliyyət göstərən zavodda "Passat", "Skoda Superb" modelləri istehsal olunurdu.

Bu barədə "Handelsblatt" nəşri öz mənbələrinə istinadla məlumat yayıb.

Müəssisənin bağlanmasının səbəbi kimi zavodun şəhər mərkəzinə yaxınlığı səbəbindən elektromobil istehsalına uyğunlaşdırılmasının çətin və baha başa gəlməsi göstərilib. İstehsalat prosesi İccen şəhərindəki digər zavoda köçürüləcək.

Qeyd olunur ki, "Volkswagen"in Çində satışları azalıb. 2024-cü ildə 3 milyondan az avtomobil satılıb ki, bu da 2012-ci ildəndən bəri ən zəif göstəricidir.