"OpenAI" GPT-5-in təqdimatına saatlar qalmış, təxminən 1000 texniki əməkdaşına ümumilikdə 1,5 milyard dollardan çox bonus paketi təqdim edib.

Valyuta.az xəbər verir ki, bonuslar vəzifə, təcrübə və performansa görə dəyişib, nağd pul və ya səhm formasında ödənilib və iki il ərzində rüblük hissələrlə verilib.

Bu addım işçi transferlərində aqressiv strategiya izləyən "Meta"ya cavab kimi qiymətləndirilir.

"Meta" yeni “Superintelligence” bölməsi üçün keçmiş "GitHub" rəhbəri Nat Friedman və "Scale AI" qurucusu Alexandr Wang da daxil olmaqla tanınmış adları heyətinə qatıb, bəzi "OpenAI" işçilərinə isə 100 milyon dollara qədər təkliflər irəli sürüb. "OpenAI" rəhbəri Sam Altman isə indiyədək əsas əməkdaşların heç birinin bu təklifləri qəbul etmədiyini bildirib.

Şirkətin istedadlı kadrları qorumaq cəhdi sürətli böyümə ilə üst-üstə düşür. "ChatGPT"nin həftəlik aktiv istifadəçi sayı 700 milyona çatıb, illik təkrarlanan gəlir 13 milyard dollara yüksəlib və 8,3 milyard dollarlıq yeni investisiya raundu baş tutub.

Nəticə etibarı ilə böyük texnologiya şirkətləri arasında “al ya da ələ keçir” strategiyası güclənir.