İspaniyanın Kataloniya bölgəsində keçirilən referendumda müstəqillik tərəfdarları qalib gəlib.

APA-nın TASS agentliyinə istinadən verdiyi xəbərə görə, bunu Kataloniya hökumətinin rəsmi nümayəndəsi Jordi Turul Barselonada keçirdiyi mətbuat konfransında bəyan edib.

Onun sözlərinə görə, səsvermədə iştirak edənlərin 90%-i müstəqilliyin lehinə səs verib.

“2 milyon 20 min 144 nəfər İspaniyadan ayrılmaq qərarı verdi. Demək olar ki bu, referendumun yekun nəticələridir”, deyə J.Turul qeydı edib. Seçici fəalliğı ilə bağlı dəqiq məlumat hələ ki, məlum deyil.

Qeyd edək ki, ötən gün Kataloniyada müstəqilliklə bağlı referendum keçirilib. İspaniya hökuməti referendumu qeyri-qanuni hesab edib, polis seçki məntəqələrində səsvermənin qarşısının alınması üçün tədbirlər görüb. Kataloniya hökumətinin verdiyi məlumata görə, polislə toqquşmalarda 844 nəfər xəsarət alıb. İspaniya Daxili işlər nazirliyi toqquşmalar zamanı 33 asayiş keşikçisinin yaralandığını bildirib.

***

02:38

Oktyabrın 1-də İspaniyanın Kataloniya bölgəsində keçirilən seçkilərdə müstəqillik tərəfdarları qalib gəlir.

APA-nın məlumatına görə, bu barədə “La Vanguardia” qəzeti xəbər verib.

İndiyədək 308 min bülleten hesablanıb. Məlumata görə, səs verənlərin 91 faizindən çoxu müstəqilliyin lehinə səs verib. Seçici fəalliğı ilə bağlı dəqiq məlumat hələ ki, verilmir.

Qeyd edək ki, oktyabrın 1-də Kataloniyada müstəqillik referendumu keçirilib. İspaniya hökuməti referendumu qeyri-qanuni və qəbuledilməz adlandırıb.