"Bir tərəfdə təcavüzkar Rusiya, digər tərəfdə isə sülhə xoş niyyət göstərən Ukrayna var..."

Avropa İttifaqı Vladimir Putinin Ukraynada xarici idarəetmə tətbiq etmək təklifinə münasibət bildirib.
Bu barədə "moscowtimes.ru" nəşri məlumat yayıb.

Məlumatda deyilir ki, Avropa İttifaqı diplomatik xidmətinin mətbuat katibi Anitta Hipper Kreml diktatotunun sözlərini təbliğat xarakterli bəyanatlar adlandırıb və Putinin hərbi cinayətkar olduğunu vurğulayıb. O, qeyd edib ki, "Faktlar öz sözünü deyir: bir tərəfdə təcavüzkar Rusiya, digər tərəfdə isə sülhə xoş niyyət göstərən Ukrayna var", - o, deyib.

Avropa Komissiyasının rəsmi nümayəndəsi Paula Pinyu da bu mövqeyi dəstəkləyərək Ukrayna prezidenti Vladimir Zelenskinin demokratik seçkilərdə qalib gəldiyini qeyd edib. "Ukrayna xalqı seçkilər tələb etmədiyi müddətdə heç kim onları təklif etməməlidir", - Pinyu vurğulayıb.

Bunun fonunda Parisdə Ukraynanın təhlükəsizliyi məsələlərinə həsr olunmuş üçüncü beynəlxalq sammit başa çatıb. Sammitdə 31 ölkənin nümayəndələri, eləcə də Avropa İttifaqı və NATO təmsilçiləri iştirak edib.

Görüş iştirakçıları Kiyevə 17 milyard avro dəyərində əlavə hərbi yardımın ayrılması, 2 milyon ədəd artilleriya sursatının göndərilməsi və Ukraynanın ehtiyaclarına uyğun olaraq resursların daha səmərəli bölüşdürülməsi üçün koordinasiyanın gücləndirilməsi barədə razılığa gəlib.

Rusiya ilə bağlı əsas Avropa liderləri vahid mövqe nümayiş etdirib: indi sanksiyaların ləğvi üçün uyğun zaman deyil. Bundan əlavə, onlar Moskvanın Ukraynada sülh prosesini qəsdən ləngitdiyini bildirib.

"Tamamilə aydındır ki, Rusiya siyasi oyun aparır və sülh danışıqlarını uzadır. Biz ABŞ-ın təşəbbüsünü dəstəkləyərək, Kremlə danışıqlar masasına əyləşmək üçün təzyiqləri artırmaq məqsədilə sanksiyaların sərtləşdirilməsi imkanını müzakirə etdik", - Böyük Britaniya baş naziri Kir Starmer bəyan edib.

Almaniya kansleri Olaf Şolts məhdudiyyətlərin yalnız dayanıqlı sülh əldə olunduqdan sonra ləğv edilə biləcəyini vurğulayıb: "Bu an hələ yetişməyib, ona görə də sanksiyaların ləğvindən danışmaq mənasızdır. Təəssüf ki, biz hələ də sülh razılaşmasından kifayət qədər uzağıq".

Fransa prezidenti Emmanuel Makron da Moskvaya qarşı təzyiqlərin artırılmasının vacibliyini qeyd edib: "Biz sanksiyaları, o cümlədən Rusiyanın "kölgə donanmasına" qarşı tədbirləri gücləndirməyə davam edəcəyik". Avropa qüvvələrinin Ukraynaya göndərilməsi məsələsi isə müzakirə mövzusu olaraq qalır.

Makronun sözlərinə görə, gələcək təhlükəsizlik zəmanətləri üç əsas prinsipə əsaslanmalıdır: Ukrayna ordusunun gücləndirilməsi, təhlükəsizlik qüvvələrinin strateji əhəmiyyətli bölgələrə yerləşdirilməsi və sülh danışıqlarında iştirak edəcək ümumi Avropa silahlanma proqramının hazırlanması.

Xatırladaq ki, bundan öncə Vladimir Putin Ukraynada beynəlxalq müvəqqəti idarəetmənin tətbiqinin Moskva və Kiyev arasında sülh müqaviləsinin bağlanmasına doğru bir addım ola biləcəyini bildirib.

"BMT, ABŞ, Avropa ölkələri, eləcə də bizim tərəfdaş və dostlarımızın himayəsi altında Ukraynada müvəqqəti idarəetmənin tətbiqi imkanını müzakirə etmək olardı. Bu, demokratik seçkilərin keçirilməsinə imkan yaradardı", - o, vurğulayıb. Putin yenidən Ukrayna prezidenti Vladimir Zelenskinin legitimliyini şübhə altına alaraq bildirib ki, "əgər o qeyri-legitimdirsə, deməli, digərləri də qeyri-legitimdir".

Ağ Ev Putinin təşəbbüsünü qəti şəkildə rədd edərək vurğulayıb ki, Ukraynada hakimiyyət yalnız xalq və Konstitusiya tərəfindən müəyyən edilir. Daha sonra Rusiya prezidentinin mətbuat katibi Dmitri Peskov Putinin təklifinin yalnız "nəzəri xarakter daşıdığını" bəyan edib.

Bu məsələ ilə bağlı Ukrayna prezidenti Vladimir Zelenski də fikrini bildirib. "Bizdə prezident xalqın iradəsi və Konstitusiyaya uyğun olaraq seçilir. Avropa İttifaqı da eyni şəkildə hərəkət edib. Avropalı tərəfdaşlarımızın hamısı bu iddianı hətta ehtimal olaraq belə rədd edib. Hamı anlayır ki, Ukrayna prezidenti qanuni və legitimdir, Putin isə hərbi cinayətkardır. Yəni bu, bu gün bütün sivil dünyanın cavabıdır", - Zelenski bildirib.

"Putin Ukrayna ilə danışıqlardan qorxur, mənimlə şəxsən danışıqlara getməkdən çəkinir. Ukraynanı bu yolla prosesdən kənarlaşdırmaqla, onun üçün Ukraynanın müstəqil tərəf olmadığını göstərmək istəyir. Lakin mən hesab edirəm ki, əsas problem başqadır: onun Ukrayna tərəfi ilə danışıqlarda arqumentləri yoxdur", -
Zelenski vurğulayıb.

O, bir daha Putinin həqiqətən cinayətkar olduğunu və onun ordusunun işğalçı olduğunu qeyd edib. "O, müharibəni bitirmək istəmir, buna görə də bir daha deyirik ki, ona göstərilən təzyiq kifayət deyil. Bizim üçün ən vacibi odur ki, bunu Amerika Birləşmiş Ştatları da tanısın. Avropa artıq tam şəkildə bunu anlayır", - Zelenski vurğulayıb.