Haqqin.az və virtualaz.org saytlarında Azərbaycanın Xarici İşlər Nazirliyində bir sıra əməkdaşların İlham Əliyev hakimiyyətinə qarşı az qala üsyana çağıran çıxışlarına dair araşdırmasından sonra bu sistemdə təcili qaydada təmizləmələr başlayıb.

Virtualaz.org saytına məlumatlı mənbələrdən daxil olan informasiyaya görə, artıq anti-hakimyyət çıxışlarına görə iki səfirin geri çağırılması proseduru başlayıb.

XİN Azərbaycanın Avropa İttifaqındakı keçmiş səfiri, hazırda ölkəni İslam Konfransı Təşkilatında (İKT) təmsil edən, 1993-cü ildən XİN sistemində işləyən, Bakıdakı bina yanğınına görə sosial şəbəkələrdə açıq şəkildə xalqı bu hakimiyyətə qarşı səbr nümayiş etdirməməyə çağıran səfir Arif Məmmədovun geri çağırılacağı barədə İKT-yə məlumat verib.

Tezliklə onun səfir vəzifəsindən azad olunacağına dair fərmanın imzalanacağı gözlənilir.

Bundan əvvəl isə prezident üsyankarlardan birinin - XİN əməkdaşı Anar Mədətlinin (o, səfir Arif Məmmədovun xalqı hakimiyyətə qarşı etiraza çağırmış facebook statusunu like edənlərdən biridir) atası, Azərbaycanın Ukraynadakı səfiri və GUAM yanındakı daimi nümayəndəsi Eynulla Mədətlinin vəzifəsindən azad edilməsinə dair fərman verib.

Xatırladaq ki, onun oğlu Anar Mədətli Azərbaycanın Belçikadakı səfirliyinin əməkdaşıdır.

XİN-dəki gizli antiəliyevçilər arasında Belçikadakı səfirliyin daha iki əməkdaşı yer alır. Bunlar Fərəh Gözəlova və Ramiz Vəliyevdir.

Saytımıza daxil olan məlumata görə, XİN rəhbərliyinin göstərişi ilə gizli antiəliyevçi hərəkatın bütün üzvləri, o cümlədən XİN-in mətbuat xidmətinin rəhbəri Hikmət Hacıyevin barəsində xidməti təhqiqat başlayıb. Cinayət işlərinin qaldırılması da gözlənilir.