ABŞ-da 43 yaşlı Çariti Klark balıqçılıq ipinə dolaşmış akulanı əlləri ilə xilas edib.

32gun.az xəbər verir ki, bu barədə Good News Network məlumat yayıb.

Hadisə Bİg-Payn-Ki adası yaxınlığında baş verib. Klark həmin gün dostları ilə birlikdə qayıqla gəzintidə olarkən krab tələsinin qəribə hərəkət etdiyini görüb. Araşdırdıqda məlum olub ki, suyun altında bir akula var və o, quyruğundan başına qədər qalın balıqçılıq ipinə bərk şəkildə dolaşıb.

“Heyvanın çətin vəziyyətdə olduğunu görəndə bir an belə tərəddüd etmədim. Dərhal kömək etməli olduğumu düşündüm,” – deyə Klark bildirib.

Əlində heç bir vasitə olmayan qadın akulanı ehtiyatla sudan çıxararaq bədəninə dolaşmış metrlərlə ipi açmağa başlayıb. Onun sözlərinə görə, həmin vaxt akula tonik vəziyyətdə olub – bu, akulalar çevrildikdə baş verən müvəqqəti iflic halıdır. Bu səbəbdən Klark yırtıcının ona zərər verməyəcəyindən əmin olub.

Lakin prosesin gərgin anı akulanın qəfildən özünə gəlib çırpınmağa başlaması ilə yaşanıb.

“Bu, həm də inanılmaz bir rahatlıq anı idi – çünki onun yenidən hərəkət etdiyini gördüm,” – deyə Klark qeyd edib.

Son ip parçası da açıldıqdan sonra akula yavaş-yavaş özünü toplayıb və açıq suya doğru üzərək gözdən itib. Hadisənin şahidləri balığın xilas edildikdən sonra özünü daha yaxşı hiss etdiyini bildiriblər.