Yaponiyada Olimpiya məşəli estafetini təmin edən işçilərdən biri koronavirusa yoluxub.

Bu barədə “Kyodo” xəbər verir.

Mərasimdə ilk yoluxma hadisəsi Kaqava Prefekturasında estafet yarışında qeydə alınıb. Yoluxan şəxs mərasim zamanı asayişi təmin edən 30 yaşlı polis məmurudur.

Qeyd edək ki, martın 25-də başlayan Olimpiya məşəli estafeti 121 gün davam edəcək və Yaponiyanın 47 əyalətinin bütün 859 bələdiyyəsində keçiriləcək. Burada təxminən 10 min nəfərin iştirak edəcəyi gözlənilir.

2020 Yay Oyunları 23 iyul - 8 avqust tarixlərində Tokioda keçiriləcək. Koronavirus pandemiyası səbəbindən yarış 2020-ci ildən bu ilə təxirə salınıb. Xəstəliyin yayılma təhlükəsinə görə olimpiya yarışlarının əcnəbi tamaşaçısız keçirilməsinə qərar verilib.