Xəbər verdiyimiz kimi, dünən Muay-Tay Federasiyasının sədri Araz Musayev Antalyada bıçaqlanıb.

Musavat.com xəbər verir ki, Türkiyə mətbuatının məlumatına görə, Araz Musayevə edilən hücumda 4 nəfər iştirak edib, onlardan biri Rusiyaya qaçıb.

Artıq bildirildiyi kimi, onlardan ikisi, Azərbaycan vətəndaşları Antalya hava limanında saxlanılıb. Üçüncü şübhəli Rusiyaya qaçmağı bacarıb, dördüncü şəxs isə hələ də axtarışdadır. Onun axtarışı davam edir.

Şübhəlilərin Türkiyəyə giriş tarixləri və onların icarəyə götürdüyü avtomobillər araşdırılıb. Polis bu qənaətə gəlib ki, dörd nəfərdən ibarət qrup əvvəlcədən planlaşdırılmış və qəsdən adam öldürmək məqsədilə hücumu həyata keçirmək üçün Türkiyəyə gəlib.

Polis əməkdaşları müəyyən ediblər ki, Araz Musayevi bıçaqlayan iki şübhəli hadisə yerindən taksi ilə uzaqlaşıb.

Qeyd edək ki, hadisə Antalya şəhərində baş verib. Burada IFMA versiyası üzrə dünya çempionatı keçirilir. Turnirdə Azərbaycandan 14 idmançı iştirak edir və nümayəndə heyətinə Araz Musayev rəhbərlik edir.

Turnirdən bir gün əvvəl Azərbaycan millisinin bir üzvü yarımfinala çıxıb. Lakin həmin gün Araz Musayevlə türkiyəli idmançı arasında mübahisə yaranıb. Təşkilatçıların müdaxiləsi ilə insident tezliklə aradan qaldırılıb və yarış davam etdirilib.

Lakin günorta fasiləsi zamanı Musayevlə Türkiyə nümayəndə heyətinin rəhbəri arasında yeni mübahisə başlayıb. Tərəflər idman kompleksinin kənarına çıxıblar və mübahisə fiziki toqquşmaya çevrilib.

Nəticədə Araz Musayev kürəyindən bıçaqlanıb. O, təcili olaraq xəstəxanaya çatdırılıb və əməliyyat olunub.

Son məlumata görə, Musayevin vəziyyəti sabit, lakin ağır olaraq qiymətləndirilir.