Müasir futbol tarixinin ən tanınmış və uğurlu oyunçularından biri olan Cristiano Ronaldo təkcə futbolla deyil, eyni zamanda qurduğu biznes imperiyası ilə də dünyanın ən tanınmış və gəlirli şəxslərindən biridir.

Valyuta.az xəbər verir ki, C.Ronaldonun aktiv futbol karyerası artıq sona yaxınlaşıb. Bəs Ronaldo karyerası bitdikdən sonra necə qazanacaq?

“CR7”şəxsi brend markası: Ronaldo öz adını bir brendə çevirə bilmiş nadir idmançılardandır. "CR7" brendi altında o, geyim, ayaqqabı, alt paltarı, ətir və digər məhsullar istehsal və satışı ilə məşğuldur. Bu sahədəki gəlirlər onun futboldan qazandıqlarını bir çox hallarda ötür.
Otelləri: Ronaldo "Pestana CR7" adlı otel şəbəkəsinin həmtəsisçisidir. Portuqaliyada başlayan bu biznes artıq İspaniya və digər Avropa ölkələrinə doğru genişlənir.

Sosial media gəlirləri: "İnstagram"da 658 milyon izləyicisi olan Ronaldo dünyanın ən çox qazanan influenserlərindən biridir. Tək bir reklam paylaşımı üçün 1-2 milyon dollar civarında ödəniş alır.

Reklam və sponsorlar: “Nike”, “Herbalife”, “Binance”, “Clear”, “TAG Heuer” və digər qlobal markalarla uzunmüddətli müqavilələr Ronaldoya illik on milyonlarla dollar qazandırır. Bu tip müqavilələr, adətən, idmançının karyerasından sonra da davam edir - onun imici və tanınırlığı brendlər üçün daha çox əhəmiyyət kəsb edir.

Klub sahibliyi və media layihələri: Futbolu tərk etdikdən sonra Ronaldo-nun futbol klubu sahibi olacağı da ehtimal olunur. Messi-nin və Beckham-ın bu sahəyə keçid etməsi, Ronaldo-nun da bu sahəyə yönəlməsini real edir. Bundan əlavə, sənədli filmlər, motivasiya verilişləri və ya öz şəxsi media platformasını yaratmağı da mümkündür.

Nəticə etibarı ilə Ronaldo-nun futbol karyerası sona çatsa belə, onun iqtisadi və maliyyə gücü azalmaq əvəzinə daha da möhkəmlənəcək. Onun 850 milyon dollarlıq sərvəti, onun uzun müddət dünyanın iqtisadi və mədəni həyatında qalmasını təmin edəcək. Futbol meydanını tərk etsə də, Ronaldo maliyyə və brend oyununda hələ uzun müddət "lider" olacaq.