Şəmkir rayon sakini, 1992-ci il təvəllüdlü Vüqar Əliyev həmkəndlisi, 20 yaşlı Pərvin Tanırverdiyevi bıçaqlayaraq öldürüb.

Dia.az Publika.az-a istinadən xəbər verir ki, hadisə ötən ilin avqustunda baş verib.

Vüqar Əliyev qonşusu Pərvin Tanrıverdiyev və iş yoldaşı Səliqə Hüseynova ilə birlikdə rayonun Zəyəm kəndində toya gediblər.

Toyda başlayan mübahisə

Onlar iş yoldaşları Şəlalə Hüseynovanın qardaşı oğlunun kiçik toy məclisində iştirak ediblər. Həmin gün axşam saatlarında Vüqar Əliyev, Səliqə Hüseynova və Pərvin Tanırıverdiev toydan çıxıblar. Həmin vaxt Vüqar da, Pərvin də sərxoş olublar.

Yol gedərkən Vüqar toyda Şiştəpə kənd sakini Sahib İbrahimovla aralarında mübahisə düşdüyünü və onların mübahisəsinə Pərvin Tanırverdiyevin müdaxilə etmədiyini xatırlayıb və bu səbəbdən Pərvinlə sözü çəp düşüb.

Vüqar qonşuları Rafiq Xudaverdiyev, Rəhman Əhmədov, Səliqə Hüseynovanın yanında Pərvin Tanrıverdiyevin ünvanına nalayiq söyüşlər söyüb, onu yumruq və təpiklə vurub.

20 yaşlı oğlana 22 bıçaq zərbəsi

Bundan sonra qonşuları Rafiq Xudaverdiyev, Rəhman Əhmədov, Səliqə Hüseynova, habelə Pərvin Tanırverdiyevin atası Nəbi Tanırverdiyev onların dalaşmasının qarşısını alıb. Dava sakitləşəndən sonra Vüqar Əliyev evinə gedib.

Təxminən 10 dəqiqə keçəndən sonra Pərvin Tanrıverdiyev Vüqar Əliyevin evinə gələrək onun boynunu qucaqlayıb və onunla barışmaq istəyib. Amma Vüqar Əliyev onunla barışmaq istəməyib və mübahisə yenidən böyüyüb. Mübahisə zamanı Vüqar Pərvin Tanrıverdiyevi bıçaqlayaraq öldürüb. Vüqar 20 yaşlı Pərvinə 22 bıçaq zərbəsi vurub.

Oğlu öldürülən ana qatilin evini yandırdı

Bu hadisədən şok vəziyyətinə düşən mərhumun anası Səba Tanrıverdiyeva Vüqar Əliyevin yaşadığı ünvana gələrək həmin mənzili yandırıb. Hadisə nəticəsində ümumi sahəsi 169 kvadratmetr olan ev külə dönüb.

Qatilə 17 il cəza

Vüqar Əliyev Cinayət Məcəlləsinin 120.2.2-ci (xuliqanlıq niyyəti ilə adam öldürmə) və 221.1-ci (xuliqanlıq) maddələri ilə ittiham edilib və cinayət işi baxılması üçün Gəncə Ağır Cinayətlər Məhkəməsinə göndərilib. Cinayət işi hakim Faiq Mahmudovun icraatına verilib. Məhkəmə araşdırması zamanı Vüqar Əliyevin xuliqanlıq niyyəti ilə adam öldürməsi tam sübuta yetirilib. Məhkəmənin hökmü ilə o, 17 il müddətinə azadlıqdan məhrum edilib.

Qatil şərti cəza istədi

Birinci instansiya məhkəməsinin hökmündən narazı qalan Vüqar apellyasiya şikayəti verib. O, cəzasının şərti cəza ilə əvəzlənməsini istəyib.

Vüqar Əliyevin şikayəti araşdırılması üçün Gəncə Ağır Cinayətlər Məhkəməsinə göndərilib. Hakim Bədəl Əliyevin sədrliyi ilə keçirilən prosesdə Vüqar Əliyev çıxış edib.

"Ailənin tək övladıyam”

Vüqar Əliyev qeyd edib ki, birinci instansiya məhkəməsinin hökmü əsassızdır: "Mənə azadlıqdan məhrum etmə cəzasının tətbiq edilməsi gənc ailəmin dolanışığını həddindən artıq ağırlaşdırıb. Himayəmdə yaşlı, xəstə anam və azyaşlı övladım var. Atasız və evin tək oğlu olduğuma görə ailəmin dolanışığını mən təmin etmişəm. Həbs olunandan sonra evimizin yandırılması, ailə üzvlərimin döyülərək təhqir olunması və ailəmin evsiz qalması birinci instansiya məhkəməsi tərəfindən nəzərə alınmayıb. Məhkəmə mənə həddindən artıq ağır cəza təyin edib”.

Apellyasiya Məhkəməsi Vüqar Əliyevin apellyasiya şikayətini təmin etməyib.