Dağıstanda hüquq-mühafizə orqanları Mahaçqala hava limanında baş verən iğtişaşlarda iştirak edən 150-dən çox şəxsin kimliyini müəyyən edib.

“Qafqazinfo” “RBK”ya istinadən xəbər verir ki, onlardan 60 nəfəri artıq saxlanılıb.

Aksiya zamanı 20-dən çox insanın yaralandığı bildirilir. Onlar arasında həm polis, həm də mülki şəxslər var.

Rusiya Federasiyasının Dağıstan Respublikasının rəhbəri Sergey Melikov etiraz aksiyasından sonra cinayət işinin açıldığını qeyd edib.

Xatırladaq ki, oktyabrın 29-u yüzlərlə insan hava limanı ərazisində etiraz aksiyasına toplaşıb. Buna səbəb İsraildən gələn təyyarə olub. Belə ki, yerli sakinlər yəhudilərin ərazidən çıxarılmasını tələb ediblər. İnsidentlə bağlı hava limanı bağlanıb. Aeroportun oktyabrın 31-i fəaliyyətini bərpa edəcəyi planlaşdırılır.